Беларуская тэнісістка Арына Сабаленка драматычна саступіла Марыі Шарапавай
Арына Сабаленка. Фота з сайта турніра.
Беларуская тэнісістка Арына Сабаленка прайграла расіянцы Марыі Шарапавай (5:7, 6:7) у вырашальным паядынку турніру ў кітайскім Цяньцзіні (прызавы фонд - $ 426 тыс.), паведамляе БелТА.
Сённяшні фінальны матч супраць былой першай ракеткі планеты Сабаленка пачала выдатна і павяла ў ліку 4:1. Затым Шарапава пачала гуляць мацней і не толькі выраўняла становішча, але і здолела ва ўпартай барацьбе вырваць перамогу ў першым сэце - 7:5.
Старт другой партыі Арына правяла магутна - 5:1, але дасведчаная расіянка не здавалася і, як і ў першай партыі, зноў пераламала хаду паядынку - 6:5.
Сабаленка здолела перавесці гульню на тай-брэйк, у якім поспех быў на баку Шарапавай - 10:8.
Сустрэча працягвалася 2 гадзіны 7 хвілін. Марыя Шарапава выйграла свой першы тытул пасля вяртання на корт з-за допінгавай дыскваліфікацыі, цяпер у яе скарбонцы 36 пераможных турніраў пад эгідай WTA.
Марыя Шарапава з заваяваным трафеем. Фота WTA.
Нягледзячы на паразу, на наступным тыдні Арына Сабаленка, у якой зараз 102-е месца, упершыню ў сваёй кар'еры ўвойдзе ў топ-100 сусветнага рэйтынгу.
