Tesla адклікала 11 тысяч аўтамабіляў мадэлі X
Кампанія Tesla была вымушаная адклікаць 11 тысяч аўтамабіляў мадэлі Х, паведамляе Business Insider, спасылаючыся на паведамленне кампаніі. Аказалася, што ў мадэлі выявіліся праблемы з заднімі сядзеннямі, якія могуць паўплываць на бяспеку пасажыраў. Нягледзячы на тое, што толькі ў 3% красовераў маецца такая праблема, вытворцы прынялі рашэнне адклікаць аўтамабілі для дыягностыкі і прадухілення няспраўнасцяў.
Няспраўнасць выявілася выпадкова. У ходзе чарговага планавага тэставання аўтамабіля Tesla X высветлілася, што кабелі ад электрапрывадаў сядзенняў другога шэрагу дрэнна замацаваныя і не адрэгуляваныя, таму падчас сутыкнення задняе сядзенне з левага боку можа скласціся наперад і ўдарыць спінкай па сядзенні кіроўцы.
Скаргаў на гэтую праблему ў Tesla не атрымлівалі, але ўсё ж вырашылі самастойна разабрацца з недахопам, не чакаючы судовых пазоваў ад уладальнікаў.
У заяве, апублікаванай Tesla, сказана, што тым, хто ўжо паспеў набыць дэфектны электракар, для ліквідацыі праблемы дастаткова звярнуцца ў сэрвісны цэнтр або выклікаць спецыяліста дадому — рэгулёўка кабеляў зойме ўсяго дзесяць хвілін і будзе зробленая за кошт кампаніі-вытворцы. Да таго часу, пакуль крэслы не адрэгуляваныя, Tesla раіць не садзіць пасажыраў на праблемныя месцы.
