У Сірыі забілі брытанскую тэрарыстку ІД па мянушцы Белая Удава
Самая шуканая тэрарыстка Вялікабрытаніі, вядомая як Белая Удава, была забітая ў Сірыі ў выніку ўдару амерыканскага дрона. Былая ўдзельніца панк-групы апошнія гады займалася вярбоўкай жанчын-смяротніц.
Фота reuters.com.
Як паведамляе The Times са спасылкай на крыніцу ў брытанскім урадзе, ЦРУ перадало брытанскім калегам інфармацыю пра тое, што 50-гадовая Салі Джонс па мянушцы Белая Удава была забіта ў чэрвені ўдарам з беспілотніка. На 100 працэнтаў пацвердзіць гэтыя дадзеныя немагчыма, паколькі не праведзены ДНК-аналіз.
Амерыканцы сцвярджаюць, што Джонс загінула, калі спрабавала збегчы з акружанай курдскімі атрадамі Ракі.
Былая ўдзельніца брытанскай панк-групы Krunch Джонс збегла ў Сірыю ў 2013 годзе разам са сваім каханым, камп'ютарным хакерам Джунаідам Хусэйнам, якія вырашылі далучыцца да «Ісламскай дзяржавы». Ураджэнец Бірмінгема Хусэйн быў забіты яшчэ ў 2015 годзе, пасля чаго Джонс атрымала мянушку Белая Удава.
Яна не толькі прапагандавала ў сацыяльных сетках ідэі ІД і бараніла масавыя пакаранні, але таксама заклікала жанчын станавіцца смяротніцамі. Пазней Джонс узначаліла жаночае крыло групоўкі «Анвар аль Аўлакі», задачай якой з'яўлялася падрыхтоўка тэрактаў у краінах Захаду.
