Прэзідэнт Грузіі супраць пераходу да парламенцкай рэспублікі
Прэзідэнт Грузіі Георгі Маргвелашвілі наклаў вета на прынятыя парламентам змены ў Канстытуцыю, якія, сярод іншага, прадугледжваюць пераход да парламенцкай формы кіравання, паведамляе Радыё Свабода.
У телезаяве 9 кастрычніка прэзідэнт Грузіі настаяў на адмене пункту аб абранні прэзідэнта спецыяльнай калегіяй замест усенароднага галасавання і пераходу на цалкам «прапарцыйныя выбары» паводле партыйных спісаў ужо з 2020 года.
Цяпер праект канстытуцыйных паправак вяртаецца ў парламент, дзе кіроўная партыя «Грузінская мара» мае канстытуцыйную большасць, што дазваляе ёй пераадолець вета прэзыдэнта. Гэтыя змены таксама прадугледжваюць легалізацыю куплі зямлі іншаземцамі.
26 верасня парламент Грузіі прыняў у канчатковым чытанні змены ў Канстытуцыю. Апазіцыйныя партыі «Адзіны нацыянальны рух» і «Еўрапейская Грузія — рух за свабоду» ад галасавання адмовіліся. Пярэчаньні з гэтай нагоды меў і прэзідэнт Георгі Маргвелашвілі.
Чарговыя прэзідэнцкія выбары ў Грузіі павінны адбыцца ў 2018 годзе.