ЕС гатовы бачыць Лукашэнку на саміце «Усходняга партнёрства»
Reuters.com
Крыніцы ў Еўрасаюзе паведамляюць, што ЕС гатовы вітаць беларускага кіраўніка Аляксандра Лукашэнку на саміце «Усходняга партнёрства», які адбудзецца ў наступным месяцы ў Брусэлі. Пра гэта паведамляе брусэльскі карэспандэнт Радыё Свабода Рыкард Юзвяк.
Крыніцы ў ЕС у размове з Юзвякам падкрэслілі, што Беларусь была запрошаная ўзяць удзел у саміце 24 лістапада ў Брусэлі «без абмежаванняў» — гэтак жа, як і пяць іншых чальцоў «Усходняга партнёрства»: Азербайджан, Арменія, Грузія, Малдова і Украіна.
Запрашэнні на саміт былі накіраваныя краінам «Усходняга партнёрства» 6 кастрычніка.
Напярэдадні чатырох папярэдніх самітаў «Усходняга партнёрства» ЕС ясна даваў зразумець, што на іх не чакаюць Лукашэнку, які кіруе Беларуссю шмат гадоў і якога называлі «апошнім дыктатарам Еўропы».
На апошнім такім саміце, які праходзіў у Рызе ў 2015 годзе, Мінск прадстаўляў міністр замежных справаў Уладзімір Макей.
