Нападаючы зборнай Беларусі своечасова не выйшаў на замену, бо забыўся ўзяць майку
Зборная Беларусі па футболе працягвае здзіўляць заўзятараў абсурднымі гісторыямі. Трэнер Ігар Крывушэнка расказаў, чаму не паспеў своечасова правесці адну з замен у матчы Беларусь — Нідэрланды (1:3).
На 84-й хвіліне нападаючы Мікалай Сігневіч парушыў правілы ў сваёй штрафной пляцоўцы. Галандцы атрымалі права на пенальці, дзякуючы якому і перамаглі.
І праз некалькі хвілін Крывушэнка памяняў стомленага Сігневіча на іншага форварда, Антона Сароку. У размове з карэспандэнтам «Прэсбола» трэнер патлумачыў, чаму зрабіў замену так позна.
Антон Сарока.
«Справа ў тым, што я раней — яшчэ да таго эпізоду ў нашай штрафной — паклікаў Антона. Тут унутраны момант: Сарока забыўся ў раздзявалцы майку. І пакуль адміністратар Саша Храпкоўскі бегаў за ёй — вуглавы, пенальці… Не паспелі. Здавалася б, дробязь. Але, можна сказаць, і яна адыграла немалаважную ролю», — прызнаўся Крывушэнка.
