Уначы пад Ашмянамі ледзь не разбіўся поўны аўтобус — рабочыя пакінулі на трасе дарожную тэхніку ФОТЫ
Чытач «Нашай Нівы» паведаміў нам пра здарэнне на трасе Р52 (дарога ад АЭС да Ашмянаў), што адбылося ў суботу а палове на дванаццатую ночы.
Турыстычная група вярталася з Вільні на аўтобусе, але магла і не даехаць — на неасветленым участку трасы стаяла машына для драблення гравію.
«На дарозе стаяў 50-тонны грох для драбнення гравію без апазнавальных знакаў, — паведаміў нам чытач. — Добра што наш кіроўца — прафесіянал, і ён змог выратаваць увесь аўтобус ад усяго таго жудаснага, што магло здарыцца. Камусьці на памяць засталіся толькі драпіны. Уразілі словы інспектара ДАІ, які сказаў кіроўцу: «Калі ты не бачыш — хадзі пешшу». Смяяліся ўсім аўтобусам, бо прадстаўнік ДАІ казаў гэта абсалютна сур'ёзна».
Як кажа пасажыр, тая рабочая машына стаіць на ўзбочыне, але недзе на метр выступае на трасу, крук з транспартнай стужкай тырчыць над трасай — яго і абмінаў кіроўца, рэзка ўзяўшы ў лева перад самым круком, абцёршы яго.
Пакуль мы не выяснілі, якой службе належыць тая дзіўная машына.
У кампаніі-перавозчыку сітуацыю не каментуюць.
