У Беларусі адзначаны новы від птушак — стрынатка-крошка ФОТАФАКТ
Першая стрынатка-крошка (Emberiza pusilla) для Беларусі! Птушка была адлоўлена і закальцавана 02.Х на станцыі «Сасновы Бор» Дз. Кіцелем, Дз. Шамовічам і Н. Кузьмянковай, паведамляе суполка Birding Belarus.
Восеньская міграцыя птушак працягваецца, а гэта «ўраджайны» час для таго, каб пабачыць у нашай краіне рэдкія віды, якія ідуць «транзітам» з паўночных краін на зімоўку. Такім маршрутам і ляцела стрынатка-крошка, якая зрабіла невялікі прыпынак на поўначы Беларусі і падарыла нашай краіне сенсацыю ў выглядзе новага віду птушак.
Першую стрынатку-крошку для Беларусі адлавіў арнітолаг Дзяніс Кіцель 2 кастрычніка ў Віцебскай вобласці на станцыі «Сасновы Бор». Дзяніс працуе там разам з Дзмітрыем Шамовічам і Настай Кузьмянковай.
Фота Дзяніса Кіцеля
У Еўропе стрынатка-крошка падчас міграцыі адзначаецца рэгулярна, у тым ліку і ў краінах-суседках (Польшча, Латвія, Украіна). Так што беларускія арнітолагі даўно чакалі гэты від і ў нас у краіне.
