Праціўнікі ЕС занялі другое месца ў большасці акругаў былой ГДР
AFP
Па дадзеных тэлеканала ARD, пасля падліку галасоў больш чым на 75% выбарчых участкаў блок ХДС/ХСС, ад якога вылучалася канцлер Ангела Меркель, набраў амаль 33% галасоў. Блок атрымаў перамогу ва ўсіх акругах ў Баварыі і Бадэн-Вюртэмберг.
Другое месца займае СДПГ, якая адстала ад лідара амаль на 12%. У асноўным за сацыял-дэмакратаў галасавалі ў заходняй частцы Германіі, у прамысловых гарадах зямлі Паўночны Рэйн-Вестфалія, а таксама ў Гамбургу.
Трэцяе месца ўпершыню ў сваёй гісторыі з 12% займае «Альтэрнатыва для Германіі», якая выступае за дэпартацыю мігрантаў з краін Блізкага Усходу, а таксама за выхад з ЕС. Найбольшага поспеху яна дабілася ў землях, якія да 1990 года былі часткай камуністычнай ГДР.
У Цюрынгіі, Брандэнбургу і Мекленбургу яна атрымала больш за 20%, толькі ненашмат адстаўшы ад ХДС, а ў Саксоніі і наогул заняла першае месца.
Акрамя гэтага тры акругі на паўднёвым усходзе Саксоніі сталі адзінымі, дзе кандыдаты ад «Альтэрнатывы для Германіі» атрымалі перамогу як аднамандатнікі. Кожны з іх заручыўся падтрымкай амаль 35%.
Падзяліліся ў сваіх перавагах і жыхары Берліна. Калі ў заходняй частцы горада еўраскептыкі апынуліся на чацвёртым месцы з 10%, то ў раёне Марцана ва Усходняй частцы Берліна (былой сталіцай ГДР) яны занялі другое месца з 21%.
Ангела Меркель ужо пасля абвяшчэння экзіт-полаў заявіла пра намер да снежня прадставіць новы склад урада. У сваю чаргу СДПГ і «Альтэрнатыва для Германіі» заявілі пра намер быць у апазіцыі да новага кабінета.
Друкуецца ў межах спецыяльнай рубрыкі «Навіны Германіі»