Улады Лондана не працягваюць ліцэнзію Uber. 40 000 кіроўцаў згубяць працу
Упраўленне транспартам Лондана адмовілася падаўжаць Uber ліцэнзію на права пасажыраперавозак, піша The Verge. Як паведамілі прадстаўнікі ведамства, сэрвіс онлайн-замовы таксі дэманструе «недастатковы ўзровень адказнасці» і грэбуе бяспекай кліентаў.
Кампанія прыйшла ў Лондан пяць гадоў таму. Бягучая ліцэнзія Uber заканчваецца 30 верасня, пасля чаго яна не зможа аказваць паслугі ў сталіцы Вялікабрытаніі.
Насуперак патрабаванням, кажуць гарадскія ўлады, Uber не інфармаваў аб сур'ёзных крымінальных злачынствах, грэбаваў выдачай чэкаў і непразрыста афармляў медыцынскія сертыфікаты.
Больш за тое, кампанія выкарыстоўвала Greyball — таемную праграму, якая вылічала супрацоўнікаў транспартных ведамстваў і не дазваляла ім выклікаць машыну Uber са свайго смартфона, такім чынам замінаючы ўладам збіраць доказы незаконнай дзейнасці.
У падтрымку рашэння ўладаў выказаўся мэр Лондана Садок Хан. «Усе кампаніі ў Лондане павінны гуляць па правілах і прытрымлівацца высокіх стандартаў — у асаблівасці, калі гаворка ідзе пра бяспеку кліентаў, — сказаў ён. — Інавацыйныя паслугі не павінны аказвацца за кошт бяспекі кліентаў».
«3,5 мільёна лонданцаў, якія выкарыстоўваюць наш дадатак, і больш за 40 000 ліцэнзаваных кіроўцаў, якія зарабляюць на жыццё пры дапамозе Uber, будуць ашаломленыя гэтым рашэньнем», — сказаў генеральны менеджар Uber ў Лондане Том Элвідж. На тое, каб падаць апеляцыю, у кампаніі ёсць 21 дзень.
