Стала вядома, хто і якімі сумамі фінансуе кнігі пра «Мураўёва-рэфарматара» і «Белую гвардыю Белай Русі»
Цягам апошніх гадоў у Расіі выйшла нямала кніг, арыентаваных на беларускага чытача. Аўтары — так званыя «заходнерусісты», якія адмаўляюць права Беларусі на незалежнасць. Там і Бендзін, і Крыштаповіч, і аўтар заблакаванага ў Беларусі «Спутніка і погрома» Авяр'янаў-Мінскі.
Раней мы падрабязна пісалі пра гэтае кола.
Чытайце: Хто хоча зрабіць з Беларусі Заходнюю Расію — дасье
Усе яны разам і паасобку штампавалі творы, дзе даводзілі думкі пра «агульнарускую дарогу», якая толькі і можа прывесці Беларусь да росквіту.
Вось і новыя тры кнігі рыхтуюцца да выхаду. Хто гэта аплачвае?
Як высветліла «Наша Ніва», сродкі на напісанне русафільскіх кніг, нацэленых на беларускую аўдыторыю, выдаткоўвае расійская арганізацыя CIS-EMO.
Гэта своеасаблівая арганізацыя. CIS-EMO расшыфроўваецца як Commonwealth of the Independent States — Election Monitoring Organization. Яна была створаная як процівага БДІПЧ АБСЕ і назіральным місіям АБСЕ.
CIS-EMO паслядоўна прызнавала свабоднымі і справядлівымі выбары ў Расіі, Беларусі, Казахстане, Таджыкістане ды іншых краінах, дзе назіральнікі АБСЕ канстатавалі або фальсіфікацыі, або страх і адсутнасць канкурэнцыі.
Але з часам арганізацыя CIS-EMO выйшла за межы першапачатковай місіі.
Яна выдае зборнікі тыпу «Парушэнні правоў чалавека ў Літве», «Новая Еўропа Уладзіміра Пуціна» (на вокладцы — Пуцін з Лё Пэн), «Крывавыя злачынствы бандэраўскай хунты».
Саму гэтую арганізацыю стварылі ў 2003 годзе, на чале стаў расійскі паліттэхнолаг Аляксей Качаткоў, які працаваў у Дзярждуме, адказваў за сувязі з краінамі былога СССР, цяпер узначальвае фонд «Народная дыпламатыя» і мае сувязі ў тым ліку з беларускім «Румолам».
Расійскі дзяржаўны сацыяльны ўніверсітэт у Мінску, 28 кастрычніка 2016. Расійскі фонд «Народная дыпламатыя» прэзентуе студэнтам «вядомага чарнагорскага журналіста». Побач у акулярах сядзіць Сяргей Лушч. Нагадаем, што ў Чарнагорыі нядаўна была сарваная спроба дзяржаўнага перавароту, арганізаваная расійскімі структурамі.
Чытайце таксама: Ад неанацызму і змагання з «юда-хрысціянскай акупацыяй» да студыі Давыдзькі: спецматэрыял пра кіраўніка «Румола» Сяргея Лушча
Ад 2013 году CIS-EMO узначальвае Аляксандр Бядрыцкі, супрацоўнік Расійскага інстытута стратэгічных даследаванняў. Ён пазіцыянуе сябе як знаўца амерыкана-расійскіх адносін і спецыяліст па інфармацыйных войнах.
Чытайце таксама: Дырэктар Расійскага інстытута стратэгічных даследаванняў: Незалежнай Беларусі быць не можа
Вось спіс некаторых кніг, выдадзеных CIS-EMO за час яго работы:
К. Аверьянов-Минский, В. Мальцев. «Белорусский национализм против Русского мира»
Л. Криштапович, А. Филиппов. «БССР и Западная Белоруссия: 1919-1939»
А. Бендин. «Михаил Муравьев-Виленский. Усмиритель и реформатор Северо-Западного края Российской империи».
Н.Н. Малишевский.«Белая гвардия Белой Руси» (Серия «Славные имена Белой Руси»).
Материалы молодёжного форума «Общее культурное наследие России и Белоруссии». (24 апреля 2017 г.)
Гордость Советской Белоруссии. Книга I. (Серия «Славные имена Белой Руси»).
Материалы международного круглого стола «Цивилизационные основы государственности России и Белоруссии»
А адкуль сродкі на гэта? Арганізацыя CIS-EMO атрымлівае грошы з дзяржаўнага бюджэту Расіі: прэзідэнт штогод выдае Распараджэнні, якія маюць на мэце грантавую падтрымку «некамерцыйных няўрадавых арганізацыі, якія ўдзельнічаюць у развіцці інстытутаў грамадзянскай супольнасці, рэалізуюць сацыяльна значныя праекты ў сферы абароны правоў і свабод чалавека».
Вось гэтае распараджэнне за 2016 год, напрыклад, на сайце прэзідэнта Расіі.
Гранты, у сваю чаргу, звычайна праходзяць праз Нацыянальны дабрачынны фонд Расіі, або праз Расійскі саюз моладзі, у чыіх «конкурсах» «перамагае» CIS-EMO.
Колькі грантаў ад прэзідэнта Расіі атрымалі гэтыя аўтары на свае кніжкі?
Мы знайшлі некаторую інфармацыю.
Так, у 2016 годзе яны атрымалі два з паловай мільёна расійскіх рублёў (каля $45 тысяч) на «распрацоўку гуманітарнага падмурка расійска-беларускай інтэграцыі, супрацьдзеянне фальсіфікацыі гісторыі».
Што ўключае праект? «Распрацоўку і выданне тэматычнай літаратуры па беларускай гісторыі і супольнай гісторыі Расіі і Беларусі і яе распаўсюд сярод экспертнай супольнасці, студэнцкага і масавага чытача».
Як гаворыцца ў рашэнні аб выдзяленні сродкаў, «праект нацэлены на аднаўленне агульнарускай ідэнтычнасці грамадзян Расіі і Беларусі,
супрацьдзеянне фальсіфікацыі гісторыі шляхам асвятлення мінулага Беларусі без нацыяналістычных скажэнняў і перадзёргванняў. У выніку ў грамадзян Беларусі мае сфарміравацца пазітыўны вобраз Расіі, што будзе спрыяць ўмацаванню двухбаковых адносінаў ў межах Саюзнай дзяржавы РФ і РБ».
Гэта не адзіны грант у тым годзе, які атрымала загадкавая CIS-EMO, да якой прыбіліся беларускія публіцысты, таму мы не можам сказаць, колькі кніг напісана канкрэтна за гэтыя $ 45 тысяч.
Столькі ж грошай CIS-EMO, напрыклад, атрымала на падрыхтоўку экспертнага даклада «Стратэгія ўзаемадзеяння з замежнымі НПА на постсавецкай прасторы». Траціна гэтага «экспертнага даклада» прысвечана Беларусі, якую там абвінавачваюць у распальванні сепаратызму (!) на Смаленшчыне і ў Калінінградскай вобласці. Даклад выйшаў у 2016 годзе.
На гэты даклад таксама былі выдаткаваныя 2 500 000 расійскіх рублёў (каля $45 тысяч) прэзідэнцкага гранту. Прычым у гэтым разе бачна, што грошы браліся «на Крым», а атрымаўся даклад пра Беларусь і Казахстан.
Але вернемся да тых $ 45 тысяч за даклад. Такім чынам, ці не цана гэта за адну кнігу?
Гэтыя кнігі распаўсюджваюцца збольшага задарма, але прадаюцца і за грошы — у асобных праваслаўных інтэрнэт-крамах Беларусі, кшталту «Святла Фавора».
Некаторыя ўніверсітэты, напрыклад, Магілёўскі дзяржаўны імя Куляшова, нават мелі летась неасцярожнасць правесці ў сваіх сценах прэзентацыю кнігі «Несвядомая гісторыя Белай Русі». Яе правёў заходнерусіст Леў Крыштаповіч.
У планах CIS-EMO цяпер — выбіць грошы на вывучэнне «перспектыў супрацоўніцтва прыгранічных вобласцяў Расійскай Федэрацыі і Рэспублікі Беларусь».
«Саюзная дзяржава Расіі і Беларусі існуе ўжо 20 гадоў, але інтэграцыйныя працэсы ідуць не так хутка, як меркавалася спачатку. Адна з прычын гэтага, як уяўляецца, малая распрацаванасць праблемы супрацоўніцтва прыгранічных вобласцяў РФ і РБ», — пішуць аўтары ў заяўцы на грант.
Выглядае, што CIS-EMO з «маніторынгавай арганізацыі» ператварылася ў структуру, паралельнай задачай якой стала прасоўванне ідэй «рускага свету» і фінансаванне асоб, якія адстойваюць выгадныя для Расіі ідэі. Прычым калі ў краінах Еўрасаюза гэта ідэі выхаду краін з ЕС, то ў Беларусі гэта думка пра несамастойнасць беларусаў як нацыі і патрэбе Беларусі расійскага парасона.
