Фіналісткі «Міс свету на вазку» прадставяць краіну ў нацыянальных касцюмах
На конкурс прыгажосці ў Варшаву ад Беларусі паедуць дзве дзяўчыны — Ангеліна Уэльская і Аляксандра Чычыкава.
Ангеліна занятая ў мадэльным бізнэсе ўжо даўно: яна стала першай у краіне, хто, маючы дыягназ ДЦП, пачаў пракладаць сабе шлях у індустрыю прыгажосці.
Ангеліна Уэльская, працуе таксама пад псеўданімам Анёл Уэльса.
Сёлета яна знялася ў шчырай ню-фотасесіі, каб даказаць, што ў кожным целе ёсць сэксуальнасць. Акрамя Беларусі, Уэльскую ведаюць таксама ў Расіі і Украіне.
Другая ўдзельніца, Аляксандра, толькі пачынае спрабаваць сябе ў ролі мадэлі.
Аляксандра Чычыкава.
Яна «зламалася» у 17 гадоў, цяпер ёй 23: за гэты час дзяўчына навучылася жыць па-новаму. Хутка атрымае адукацыю псіхолага, удзельнічае ў пастаноўках Свабоднага тэатра і ходзіць у трэнажорную залу. Удзел у конкурсе прыгажосці — гэта спантаннае рашэнне, але цяпер Саша вельмі радая таму, што прайшла ў фіналісткі.
Як і Ангеліна, сваім прыкладам яна хоча ламаць стэрэатыпы пра людзей на вазочках і натхняць хлопцаў і дзяўчат з абмежаванымі магчымасцямі на тое, каб быць актыўнымі.
«Беларусы з адрознымі магчымасцямі не разумеюць сваёй самакаштоўнасці, ненавідзяць сябе, саромеюцца свайго цела і жаданняў. І таму становяцца яшчэ больш няшчаснымі. Я крычу ўсім: будзьце вольнымі ўнутры, тады здабудзеце свабоду звонку! На жаль, мой голас пакуль не ўсе чуюць. Але ўсё зменіцца», — лічыць Ангеліна.
Ужо вядома, што ў фінале Ангеліна і Саша прадставяць гонар краіны ў нацыянальных касцюмах. Канчатковы варыянт сукенак пакуль хаваюць у сакрэце. Першы камплект вопраткі для Сашы стваралі ў Дзяржынскім ДК, але не факт, што яна выйдзе на сцэну менавіта ў гэтым строі.
Адзін з варыянтаў нацыянальнай вопраткі.
Мадэлі не лічуць сябе канкурэнткамі: калі хаця б адна з іх прывязе дамоў статус «Міс свету на вазку», гэта будзе шмат значыць і для краіны, і для нацыянальнай сферы прыгажосці ў прыватнасці.
6 верасня стартавала інтэрнэт-галасаванне, якое вызначыць самую папулярную прыгажуню. Фінал конкурсу пройдзе 7 кастрычніка. Заўзеем за нашых!
