Кіеў пра рызыкі супольных беларуска-расійскіх вучэнняў: Расія рыхтуецца да «вялікай вайны» з Захадам
Пад выглядам стратэгічных камандна-штабных вучэнняў «Захад-2017» у Беларусі Расійская Федэрацыя можа стварыць ударныя групоўкі войскаў для пераходу дзяржаўнай мяжы і ваеннага ўварвання ва Украіну, заявіў сакратар Савета нацбяспекі і абароны Украіны Аляксандр Турчынаў.
Ён нагадаў, што за апошнія гады падобныя вучэнні неаднаразова выкарыстоўваліся Расіяй для дасягнення схаваных ваенна-палітычных мэтаў.
У прыватнасці, Турчынаў ўспомніў вучэнні «Каўказ-2008», калі расійскія войскі прыцягваліся да манеўраў і не вярнуліся з палігонаў у пункты пастаяннай дыслакацыі, пачаўшы ўзброеную агрэсію супраць Грузіі.
Падчас вучэнняў «Каўказ-2012» і «Каўказ-2016» былі адпрацаваны магчымыя варыянты прымянення груповак расейскіх войскаў і вядзення баявых дзеянняў на Паўднёва-Заходнім стратэгічным кірунку, у тым ліку супраць сіл НАТА.
Таксама вучэнні ВС РФ і Беларусі «Захад-2013» сталі пляцоўкай для адпрацоўкі сцэнарыяў узброенай агрэсіі супраць Украіны, якія Крэмль у агульных рысах паспрабаваў рэалізаваць у 2014—2015 гадах.
Падчас вучэнняў «Цэнтр-2015» пад прыкрыццём была створана ўдарная групоўка авіяцыі для прымянення ў Сірыі.
Пад выглядам бяспекі правядзення Зімовых алімпійскіх гульняў у Сочы у лютым 2014 года Расія разгарнула групоўкі войскаў для правядзення спецыяльнай аперацыі па акупацыі Крыма.
