Слесар са Слуцка вядзе душэўны інстаграм: «Можа, і каханую сабе тут знайду!»
Мы звязаліся з Міхаілам і даведаліся, што натхніла яго завесці інстаграм і пра што ён марыць.
Міхаілу Гардзейчыку 28 гадоў, усё жыццё ён пражыў у Слуцку. Працаваў аператарам кацельні, потым трактарыстам, цяпер перакваліфікаваўся ў слесара.
«Горача было летам у трактары на ўборачнай, распранешся да майткоў — вадой абліваешся, а не дапамагае. Ды і графік быў нязручны: у сезон з раніцы да ночы на полі. Цяпер я працую да 17.00 і больш магу займацца хатнімі справамі», — тлумачыць, чаму змяніў від дзейнасці, мужчына.
Міхаіл — актыўны агароднік, любоў да зямлі яму з дзяцінства прывілі бацькі, таму ў сезон пасля працы ён адразу едзе на лецішча.
У чэрвені, па парадзе стрыечнага брата, Міхаіл зарэгістраваўся ў інстаграме.
Кажа, што, у першую чаргу, для таго, каб заводзіць знаёмствы ды ўнесці ў будні крыху разнастайнасці. Пакуль у яго 100 падпісантаў з невялікім, але тыя, хто сочыць за яго фотазамалёўкамі, адзначаюць іх душэўнасць.
«Інстаграм — гэта новыя людзі, знаёмствы, зносіны. Можа, і каханую сабе тут знайду, але цяпер жанчынам толькі грошы падавай, а мне б простую трэба, гаспадарлівую, як я», —
выказвае надзею слесар і, відавочна, прыбядняецца. На такога гаспадара паклалі б вока многія, тым больш што гатуе ён слаўна — зацаніце самі (уласная выпечка, паводле яго слоў, у кадр пакуль не патрапіла, але ўсё наперадзе).
Міхаіл не выключае, што ў будучыні будзе посціць у свой гаспадарскі дзённік яшчэ і відэа, а у кадр яго смартфона патрапяць сваякі, калегі і жыхары Случчыны.
Дарэчы, за некалькі гадзін пасля публікацыі гэтага артыкула колькасць падпісчыкаў Міхаіла вырасла ў некалькі разоў.
На інстаграм Нашай Нівы ўсе падпісваюцца вось тут.
