Археолагі знайшлі манастырскую пячатку Ефрасінні Полацкай ФОТА
У час рэстаўрацыйна-археалагічных работ каля паўднёвай сцяны Спаса-Праабражэнскага храма Полацкага Спаса-Ефрасіннеўскага манастыра знойдзеная пячатка (ХІІ стагоддзе) найпадобнай Ефрасінні. Пра гэта паведамляе БЕЛТА са спасылкай на афіцыйны партал Беларускай праваслаўнай царквы.
church.by
Пячатка двухбаковая. З аднаго боку — выява найпадобнай Ефрасінні Александрыйскай — патранэсы найпадобнай Ефрасінні Полацкай. У адной руцэ ў яе крыж, другая — паднятая ў бласлаўляльным жэсце. Паводле слоў дацэнта кафедры ўсеагульнай гісторыі і методыкі выкладання гісторыі БДПУ імя Максіма Танка, кандыдата гістарычных навук Іны Калечыц, знойдзеную пячатку можна атрыбутаваць як прыналежную найпадобнай Ефрасінні Полацкай. Навуковец звярнула ўвагу на надпіс «Иефросинья» па абодвух баках выявы.
«Калі пішацца аб самой найпадобнай Ефрасінні Полацкай — пішацца «Офросинья», відаць, каб адрозніць. «Офросинья» — так, хутчэй за ўсё, найпадобную называлі. Па крузе ішоў надпіс, які павінен быў чытацца як «Господи, помози рабе Своей Офросинье на многая лета». Застаўся толькі невялікі кавалачак «на многая лета». Астатні надпіс і лік наўмысна былі сапсаваныя нейкім спецыяльным інструментам. Магчыма, атрымаўся не вельмі ўдачны адбітак пячаткі», — расказала Іна Калечыц.
З адваротнага боку пячаткі выява Хрыста Збавіцеля «Пантакратар», якая практычна поўнасцю супадае з выявай, што знаходзіцца ў Спаса-Праабражэнскім храме Полацкага манастыра на фрэсцы. «Такім чынам, гэта пячатка і найпадобнай, і пячатка манастыра», — дадала спецыяліст.
Пячатку знайшоў вядучы навуковы супрацоўнік навукова-рэстаўрацыйнага аддзела Полацкага гісторыка-культурнага музея-запаведніка Аляксандр Салаўёў. Знаходку будуць даследаваць навукоўцы розных спецыяльнасцей. «Гэта віслая пячатка, такія звычайна прывешвалі да дакументаў таго часу, калі перавязвалі, каб ніхто іх не прачытаў. Унутры прапускаўся шпагат. Пячатка была знойдзеная ў адкрытай гэтым летам грабніцы-аркасоліі», — расказаў Аляксандр Салаўёў.
Чытайце таксама:
Археолагі: царква святой Еўфрасінні Полацкай выглядала не так, як мы прывыклі ўяўляць
