Андрэй Хадановіч. Мы дзялілі часткі сушы
Мы дзялілі часткі сушы
Гэту частку — Джорджу Бушу
Гэту частку пакідаем
Трэцім рымлянам з Кітаем...
Мы дзялілі часткі сушы
Гэту частку — Джорджу Бушу
Гэту частку пакідаем
Трэцім рымлянам з Кітаем
(Што ня так? Правы Тыбэту?
Ты б яшчэ згадаў кабету!)
Гэту частку — Эўразьвязу...
Пачакай — ня ўсё адразу —
Хопіць немцам, скандынавам...
Курдыстан? А на храна вам?
Гэтую табе, араб,
У Ізраіля пара б!
Што, наадварот — габрэям?
Памыляемся. Старэем.
Хто шкадуе Індастану?
Кама-сутрай іх дастану!
Для брытанцаў, для ірляндцаў
А паўночным? Тут бяз шанцаў.
Афрыканцам. Аўстралійцам.
І крыху — кавказскім ліцам.
Ружаў — ружжаў? — для грузінаў.
Украінцам — апэльсынаў.
— Ці ня мала Беларусі?
— Я і гэтым ганаруся!
Ёсьць для рэзэрвацый нешта
І пінгвінам — уся рэшта.
А для Атлянтыды — дно.
Ёй даўно — усё адно.
* * *
Штодзённа ў рубрыцы «Літаратура» на сайце НН — новыя творы і мініятуры. Чытайце для сэрца, чытайце для розуму, чытайце для мовы.
