У Маскоўскім абласным судзе адбылася перастрэлка: трое забітых
Пры перастрэлцы ў Масаблсудзе забітыя тры фігуранты справы «банды ГТА». Пра гэта распавялі ў МУС РФ. Яшчэ двое падсудных параненыя, піша Медуза.
Раней паведамлялася, што ў ліфце суда падсудныя напалі на канваіраў і завалодалі іх зброяй, пасля чаго пачалася перастрэлка. У Следчым камітэце ўдакладнілі, што ў ліфце пяцярых падсудных суправаджалі толькі двое канваіраў.
НТВ са спасылкай на Міністэрства аховы здароўя паведамляе, што жыццю дваіх пацярпелых судовых прыставаў нічога не пагражае. Пазней «Інтэрфаксу» распавялі, што ў пацярпелых мужчыны і жанчыны няма агнястрэльных раненняў.
У МУС таксама паведамілі, што раненне атрымаў супрацоўнік Расгвардыі, а двое паліцэйскіх атрымалі траўмы.
Прэс-сакратар суда Наталля Осіпава заявіла, што ўсе эвакуяваныя пасля пачатку стральбы ўжо вярнуліся ў памяшканне.
Падсуднымі па справе «банды ГТА» праходзяць дзевяць чалавек, іх абвінавачваюць у 17 забойствах і іншых злачынствах. Па версіі следства, яны ў 2012-2014 гадах нападалі на кіроўцаў на падмаскоўных трасах.