У Беларусі ўзнагародзяць самага актыўнага падарожніка — трэба зрабіць як мага больш сэлфі на фоне турыстычных аб’ектаў
Нацыянальнае агенцтва па турызме адкрыла прыём заявак на рэспубліканскі конкурс «Пазнай Беларусь — 2017», паведамілі карэспандэнту БелТА.
Прэтэндаваць на перамогу ў намінацыі «Я пазнаю Беларусь» можа любы ахвотны (акрамя экскурсаводаў, гідаў-перакладчыкаў і супрацоўнікаў турыстычных кампаній). Для гэтага удзельнікам конкурсу трэба наведаць як мага больш славутасцяў Беларусі і зрабіць фота на іх фоне. Фотаздымкі трэба размясціць у сацыяльнай сетцы і пазначыць хэштэгамі #poznaiBelarus2017, #познайБеларусь2017, #DiscoverBelarus і геалакацыяй. Пры гэтым твар удзельніка на фота павінен быць выразна бачны, а аб'ект — пазнавальны. Пры выбары пераможцы ацэньваецца колькасць фатаграфій і іх арыгінальнасць, творчы падыход.
У дапамогу турыстам на сайце НАТ размешчаны кантрольны пералік 670 турыстычных аб'ектаў, якія прапануюцца для наведвання. У спіс увайшлі не толькі самыя вядомыя славутасці, але і іншыя цікавыя месцы — геаграфічны цэнтр Еўропы ў Полацку, Эйфелева вежа ў беларускім Парыжы, саляныя горы ля Салігорска.
Летась у намінацыі «Я пазнаю Беларусь» перамагла Тамара Казлоўская, якая зрабіла фотаздымкі на фоне 202 беларускіх славутасцяў. Цырымонія ўзнагароджання пераможцаў конкурсу пройдзе 8 снежня.
