Жыхар Слуцка прадаваў выпісаныя яму таблеткі трамадолу
Слуцкім раённым аддзелам Следчага камітэта распачатая крымінальная справа аб незаконным збыце таблетак, якія ўтрымліваюць у сваім складзе псіхатропныя рэчывы, паведамляе БЕЛТА.
Фігурантам па крымінальнай справе праходзіць раней судзімы 38-гадовы жыхар Слуцка. Мужчына стаяў ананімна на ўліку ў лекара-нарколага і меў права, згодна з выпісанымі рэцэптамі, набываць лекі, якія ўтрымліваюць небяспечныя псіхатропныя рэчывы. Ён быў папярэджаны аб прыцягненні да крымінальнай адказнасці па арт. 328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў).
Мужчына атрымліваў у аптэцы ў Мінску апіоідныя анальгетыкі і прадаваў іх у Слуцку. Падазраваны быў затрыманы падчас збыту 20 таблетак трамадолу.
Цяпер фігуранту выстаўленае абвінавачванне па ч. 2 арт. 328 КК (незаконны збыт псіхатропных рэчываў). Абвінавачаны заключаны пад варту.