Расіянін спрабаваў увезці ў Беларусь марыхуану і галюцынагенныя грыбы
У міжнародным аўтадарожным пункце пропуску «Брэст» у салоне аўтамабіля 38-гадовага жыхара Кастрамы, які рухаўся з Польшчы ў Расію, супрацоўнікі Брэсцкай мытні з выкарыстаннем магчымасцяў кіналагічнай службы пад абшыўкай багажніка і ў попельніцы знайшлі фрагменты пладовых цел грыбоў і марыхуану. Пра гэта паведамляецца на сайце ведамства.
Паводле заключэння спецыяліста ўпраўлення Дзяржаўнага камітэта судовых экспертыз па Брэсцкай вобласці, грыбы масай 10,2 г утрымліваюць асабліва небяспечнае псіхатропнае рэчыва «псілацын».
У дачыненні да кіроўцы распачатая крымінальная справа па прыкметах ч. 2 арт. 328-1 КК (незаконнае перамяшчэнне праз дзяржаўную мяжу Беларусі наркатычных сродкаў, псіхатропных рэчываў або іх прэкурсораў або аналагаў). Санкцыі дадзенага артыкула прадугледжваюць пакаранне ў выглядзе пазбаўлення волі на тэрмін ад пяці да дзесяці гадоў з канфіскацыяй маёмасці або без канфіскацыі.
