Двайнік Абамы з зоны АТА мае беларускае паходжанне ФОТАФАКТ
У красавіку ўкраінскія і расійскія сайты шмат пісалі пра двайніка былога прэзідэнта ЗША Барака Абамы, якога атрымалася сфатаграфаваць на ўсходзе Украіны. Ён валанцёрыць у так званай зоне АТА.
Журналісты выдання depo.ua расшукалі героя гэтага здымка, ім аказаўся 50-гадовы Аляксандр Жамойда. Ён жыве ў горадзе Вішнёвае Кіеўскай вобласці. Мае дваіх дарослых дзяцей — сына і дачку.
«Нават думкі не было, што я на яго падобны, — смяецца Аляксандр. — А цяпер усе тэлефануюць, ды кажуць — гэта ж ты!»
У Аляксандра Жамойды праз смуглую скуру з дзяцінства была мянушка «Цыган», хаця ромскага паходжання ён не мае.
«Бацька ў мяне беларус, маці — з Харкава. Я шукаў, у каго яшчэ прозвішча Жамойда, цікава, што ва ўсіх іх карані з Беларусі», — кажа Аляксандр.
Жамойда сябра «Правага сектара», два гады ўжо займаецца валанцёрскай дзейнасцю, збірае дапамогу сярод жыхароў свайго раёна, а потым адвозіць у зону АТА.