ЗША скінулі на пазіцыі ісламістаў у Афганістане «маці ўсіх бомбаў»
ЗША скінулі найбуйнейшую ў сваім арсенале няядзерную бомбу на пазіцыі баевікоў ІД у Афганістане, паведамілі ў Пентагоне.
Getty
Паводле інфармацыі, прадстаўленай ваенным ведамствам, гаворка ідзе аб бомбе GBU-43/B Massive Ordnance Air Blast Bomb (MOAB). Гэтая бомба таксама вядомая пад назвай Mother of All Bombs («Маці ўсіх бомбаў»).
Бомба GBU-43, даўжынёй дзевяць метраў і вагой амаль 10 тон, была ўпершыню пратэставаная ў 2003 годзе і раней у баявых умовах не ўжывалася, піша ВВС.
Яе скінулі на комплекс тунэляў, якія выкарыстоўваюцца баевікамі экстрэмісцкай арганізацыі «Ісламская дзяржава» ў раёне Ачын у правінцыі Нангахар недалёка ад мяжы з Пакістанам.
Reuters
Як сказаў камандуючы амерыканскімі войскамі ў Афганістане генерал Джон Нікалсан, «джыхадзісцкія групоўкі нясуць страты, і дзеля таго, каб адстаяць свае пазіцыі, яны выкарыстоўваюць самаробныя выбуховыя прылады, бункеры і тунэлі».
«Гэта самы прыдатны боепрыпас для знішчэння перашкод і падтрымання тэмпаў нашага наступу», — заявіў амерыканскі генерал.