BMW панёс страты на мільён еўра праз двух п'яных польскіх рабочых
Нямецкі канцэрн BMW панёс амаль мільённую шкоду пасля таго, як праз двух работнікаў у стане алкагольнага і наркатычнага ап'янення была спыненая праца канвеера, паведамляе «ЕўраПраўда» са спасылкай на Bild.
Інцыдэнт адбыўся яшчэ 3 сакавіка, калі праца канвеера для зборкі аўтамабіляў на заводзе ў Мюнхене была спыненая на 40 хвілін.
Два работнікі з Польшчы ў гэты час знаходзіліся на працоўным месцы ў стане алкагольнага і наркатычнага ап'янення.
Іх выявілі калегі і выклікалі хуткую дапамогу. У крыві рабочых былі знойдзеныя алкаголь і амфетамін.
Прадстаўнік кампаніі заявіў, што сума страт можа быць «у сярэднім пяцізначная». Паводле інфармацыі Bild, гаворка ідзе пра амаль мільён еўра страт.
Адзначаецца, што завод упершыню спыняў працу праз алкаголь і наркотыкі, якія ўжывалі работнікі.
Паводле даных выдання, абодвух работнікаў ужо звольнілі з завода.
