Сёння БАТЭ бярэ чарговы старт у Лізе чэмпіёнаў
Сёння барысаўскі БАТЭ стартуе ў новым сезоне футбольнай Лігі чэмпіёнаў. Супернікам па 2-м кваліфікацыйным раўндзе будзе фінскі СІК.
Матч БАТЭ — «Рома», які скончыўся год таму перамогай барысаўскага клуба, фота Сяргея Гудзіліна.
Першая гульня пройдзе сёння на «Барысаў-Арэне» (пачатак у 21:00, трансляцыя на «Беларусь-5»). Матч у адказ — праз тыдзень.
«Наша Ніва» плануе весці рэпартаж з Барысава.
Каб трапіць у групавы турнір Лігі чэмпіёнаў, трэба прайсці ўсе тры этапы: другі, трэці і стадыю плэй-оф кваліфікацыі.
БАТЭ пяць разоў дабіраўся да групавога турніра Лігі чэмпіёнаў.
Першы раз у сезоне 2008/2009 гг., тады супернікамі ў групе былі «Рэал», «Ювентус», «Зеніт» і велізарныя чэргі па квіткі ў Мінску.
Таксама барысаўскі клуб выходзіў у групавы этап улетку 2011, 2012, 2014 і 2015 гг.
Сярод супернікаў беларускага клуба былі таксама: «Барселона» (двойчы), «Мілан», «Баварыя» (якую перамаглі ў Мінску ў кастрычніку 2012), «Валенсія», «Порту», «Ліль», «Шахцёр», «Баер», «Рома», «Атлетык».
Двойчы БАТЭ выступаў у групавым турніры Лігі Еўропы: у 2009/2010 і 2010/2011 гг. Сюды ён выбываў праз асечкі ў кваліфікацыі ЛЧ.
