Кабякоў — Дварковічу: Прыкметнае зніжэнне тавараабароту з Расіяй — вынік, што мы разам недзе недапрацоўваем
Прэм'ер-міністр Беларусі Андрэй Кабякоў і намеснік старшыні ўрада Расіі Аркадзь Дварковіч 14 красавіка абмеркавалі ў Мінску праблему скарачэння ўзаемнага тавараабароту, паведамляе прэс-служба беларускага ўрада.
Як зазначыў Кабякоў, апошнім часам тавараабарот прыкметна знізіўся. «Так, за два месяцы гэтага года мы страцілі ў сярэднім недзе 35% тавараабароту», — зазначыў прэм'ер. Перш за ўсё, паводле яго слоў, гэта звязана з тым, што адбылася карэкцыя валютных курсаў.
Аднак разам з цэнавым назіраецца і скарачэнне фізічных аб'ёмаў. «А гэта вынік таго, што мы разам недзе недапрацоўваем», — дадаў Кабякоў.
У сувязі з гэтым ён нагадаў, што Беларусь і Расія падпісалі сумесны план дзеянняў урадаў, які прадугледжвае дадатковыя меры развіцця гандлёва-эканамічнага супрацоўніцтва, скіраваны на максімальную ліквідацыю ўзаемных бар'ераў, якія пакуль яшчэ маюцца.
Падчас сустрэчы бакі абмеркавалі таксама іншыя пытанні, звязаныя з перспектывамі развіцця двухбаковага супрацоўніцтва, у тым ліку рэалізацыю знакавых інвестыцыйных праектаў.
