Жураўкоў пра стартапы: У Беларусі не хапае агрэсіўнага досведу па прасоўванні сваіх распрацовак
Ініцыятыўным беларусам, якія ствараюць уласныя стартапы, пакуль не хапае досведу па прасоўванні сваіх распрацовак, заявіў міністр адукацыі Міхаіл Жураўкоў 14 красавіка на адкрыцці мінскага этапу Міжнароднага ўсерасійскага стартап-тура ў Нацыянальнай бібліятэцы Беларусі.
Паводле яго слоў, сёння ў сістэме беларускай адукацыі працуюць некалькі стартап-цэнтраў, тэхнапаркі, а на шматлікіх інавацыйных прадпрыемствах актыўна працуюць студэнты. «Мы праводзім дастатковую колькасць курсаў, семінараў, якія прысвечаныя стартапаўскаму руху, мы актыўна працуем з Паркам высокіх тэхналогій… У нас ёсць цікавыя праекты, мы праводзім уласныя конкурсы, і што радуе, універсітэты знаходзяць фінансаванне праектаў у прадстаўнікоў бізнесу», — адзначыў чыноўнік.
Аднак пакуль у Беларусі «крыху не хапае агрэсіўнага досведу ў прасоўванні сваіх распрацовак» унутры краіны, лічыць Жураўкоў. Адсутнасць падобнага досведу прыводзіць да таго, што «многія студэнты гатовыя пераехаць у Расію, калі іх толькі заўважаць у «Сколкава». «Для нас гэта не вельмі добра. Мы б хацелі, каб у «Сколкава» адчулі, што можна стварыць добрыя прадпрыемствы тут [у Беларусі], што можна пакінуць тут фінансы, якія паслужаць узаемнаму развіццю», — сказаў міністр.
У сваю чаргу віцэ-прэзідэнт па знешніх камунікацыях і рэкламе фонду «Сколкава» Аляксандр Чарноў запэўніў Жураўкова, што фонд будзе вельмі рады, калі «беларускія стартапы па максімуме выкарыстаюць грошы, магчымасці, кантакты» і будуць развівацца ў Беларусі.
Міністр адукацыі таксама падкрэсліў, што правядзенне ў Беларусі аднаго з этапаў стартап-тура з'яўляецца «вельмі важным і знакавым мерапрыемствам для сістэмы адукацыі», паколькі «адукацыя без навукі, навукова-тэхнічнай і інавацыйнай дзейнасці сёння немагчымая».
«Вельмі добра, што не толькі студэнты, але і школьнікі старэйшых класаў цяпер вельмі цікавяцца камерцыялізацыяй сваіх навуковых даследаванняў. У гэтым нічога дрэннага няма — яны хочуць быць разумнымі, распрацоўваць штосьці і атрымліваць за гэта годную ўзнагароду ў любым выглядзе», — сказаў Жураўкоў.
Усерасійскі стартап-тур з'яўляецца маштабным праектам, які скіраваны на пошук перспектыўных інавацыйных праектаў і аказанне дапамогі маладым распрацоўшчыкам у сферы высокіх тэхналогій, якія жадаюць развівацца. Сёлета ён набыў статус міжнароднага, паколькі мерапрыемствы праходзяць не толькі ў Расіі, але і ў сумежных краінах — Беларусі і Казахстане.
Форум арганізаваны фондам «Сколкава» пры садзеянні Федэральнага агенцтва па справах моладзі, Фонду спрыяння развіццю малых форм прадпрыемстваў у навукова-тэхнічнай сферы, дзяржкарпарацыі «Раснана» і іншых ведамстваў і аб'яднанняў. Арганізатарам мінскага этапу гэтага праекта, які праходзіць 14—15 красавіка ў Нацыянальнай бібліятэцы Беларусі, выступіў Дзяржкамітэт па навуцы і тэхналогіях пры падтрымцы Мінскага гарадскога тэхнапарка.