У Мінпрацы растлумачылі, адкуль узялася сума ў 20 б.в. на «збор на дармаедаў»
Сума збору на фінансаванне дзяржаўных расходаў у памеры 20 базавых велічынь (БВ) арыенціровачна адпавядае сярэдняй паўгадавой суме падаходнага падатку з фізічных асоб, выплачанага плацельшчыкамі такога падатку ў 2013 годзе.
Аб гэтым заявіў намеснік міністра працы і сацыяльнай абароны Беларусі Валерый Кавалькоў на анлайн-канферэнцыі «Аб папярэджанні сацыяльнага ўтрыманства», што прайшла на сайтах БЕЛТА і міністэрства.
Адказваючы на пытанне аб тым, як суадносіцца памер збору з сумай дзяржрасходаў у разліку на аднаго чалавека, Валерый Кавалькоў адзначыў, што ў адпаведнасці з дэкрэтам нумар 3 грамадзянін абавязаны заплаціць у бюджэт за адпаведны год збор на фінансаванне дзяржаўных расходаў у суме 20 базавых велічынь зыходзячы з памеру базавай велічыні, устаноўленай на 1 студзеня адпаведнага падатковага перыяду.
Плацельшчыкамі збору на фінансаванне дзяржаўных расходаў прызнаюцца працаздольныя грамадзяне Беларусі, замежныя грамадзяне і асобы без грамадзянства, якія атрымалі дазвол на пастаяннае пражыванне ў рэспубліцы, у выпадку іх няўдзелу ў фінансаванні дзяржаўных расходаў або ўдзелу ў такім фінансаванні менш за 183 каляндарныя дні ў каляндарным годзе.
