Мясніковіч: У кіраўнікоў некаторых прадпрыемстваў прысутнічаюць утрыманскія настроі
У кіраўнікоў некаторых прадпрыемстваў і галін беларускай эканомікі прысутнічаюць пэўныя ўтрыманскія настроі. Такое меркаванне выказаў сёння журналістам старшыня Савета Рэспублікі Нацыянальнага сходу Беларусі Міхаіл Мясніковіч, які ўзначальвае маніторынгавую групу, што займаецца выпрацоўкай прапаноў па актуальных праблемных пытаннях у эканоміцы і вытворчай сферы.
«У кіраўнікоў шэрага прадпрыемстваў і нават галін прысутнічаюць пэўныя ўтрыманскія настроі, што нехта павінен даць, вырашыць, дапамагчы і гэтак далей. А ў першую чаргу трэба разлічваць на ўласныя сілы», — заявіў Міхаіл Мясніковіч.
У якасці прыкладу ён прывёў сітуацыю ў аграпрамысловым комплексе, адносна якога ў цэлым у Беларусі выбудавана неабходная сістэма падтрымкі. «Але недастаткова актыўныя нашы сельгасвытворцы, каб паспяхова рэалізоўваць вырабленую прадукцыю», — сказаў старшыня Савета Рэспублікі. Паводле яго даных, па шэрагу пазіцый у сістэме беларускіх АПК сабраліся істотныя запасы гатовай прадукцыі.
«Неабходна гнутка працаваць з цэнамі і рынкамі. Так, расійскі рынак для нас прэміяльны, але не трэба забываць аб вялікім кітайскім рынку, дзе, можа, даходнасць некалькі ніжэйшая, але аб'ёмы продажаў могуць быць значна вышэйшыя. І трэба мець на ўвазе, што тая ж Расія значна нарошчвае аб'ёмы вытворчасці ўласных прадуктаў харчавання, — сказаў Міхаіл Мясніковіч. — Тое, што патрабуе прэзідэнт па дыверсіфікацыі рынкаў, датычыцца не толькі ўрада або маніторынгавай групы. У першую чаргу за стан спраў павінен несці адказнасць кіраўнік прадпрыемства».
Разам з тым Міхаіл Мясніковіч канстатаваў, што прадпрыемствы ў сваёй рабоце, у тым ліку пры рэалізацыі бізнес-планаў па мадэрнізацыі, сутыкнуліся з шэрагам аб'ектыўных цяжкасцей у выглядзе знешніх фактараў.
«Сітуацыя змянілася настолькі радыкальна, што гэтыя бізнес-разлікі сталі неактуальнымі. Хто мог падумаць, што цэны на нафту ўпадуць у два з лішнім разы або дэвальвацыя расійскага рубля будзе 100 працэнтаў? Нават павялічваючы экспарт у трэція краіны, мы не можам перакрыць недабор на тых рынках, якія склаліся традыцыйна, у першую чаргу па расійскім рынку», — канстатаваў Міхаіл Мясніковіч.
«Таму я сёння дакладваў пэўныя меркаванні па валютнай палітыцы. Тут трэба разумець, што фінансавы рынак павінен абслугоўваць эканоміку, а не эканоміка павінна абслугоўваць фінансы. Ад здароўя «крывяноснай сістэмы» залежыць тое, як будзе развівацца эканоміка. Безумоўна, калі недасканалая або патрабуе пэўных рашэнняў грашова-крэдытнай палітыка, то эканоміка гэтыя пытанні самастойна не вырашыць», — лічыць старшыня Савета Рэспублікі.
