Навукоўцы вырасцілі расліну, якая выяўляе супрацьпяхотныя міны

Навукоўцы з дацкай біятэхналагічнай кампаніі Aresa Biodetection вывелі спецыяльны генетычна-мадыфікаваны сорт невялікіх кветак арабідопсіс, якія змогуць дапамагчы ідэнтыфікаваць месцазнаходжанне супрацьпяхотных мінаў, усталяваных пад зямлёю,

паведамляе часопіс Nature.

«Супрацьмінны» арабідопсіс ад Aresa Biodetection вельмі чуллівы да дыяксіду азоту — газу, які ўтвараецца пры разлажэнні міны пад зямлёй.

Пры павышанай канцэнтрацыі гэтага газу ў глебе, зялёнае лісце і сцябло расліны становіцца чырвоным, пазначаючы тым самым месца, дзе закапаная міна.

Насенне арабідопсісу можна бяспечна высяваць з самалётаў, а каб прадухіліць стыхійнае распаўсюджванне генна-мадыфікаванай расліны, навукоўцы выдалілі з яе ген, адказны за рост, і каб размнажацца, ГМ-арабідопсіс патрабуе адмысловае ўгнаенне.

У свеце, па розных ацэнках, налічваецца больш за 100 мільёнаў усталяваных супрацьпяхотных мінаў.

Арабідопсіс, які расце ў Еўропе, Азіі і на поўначы Афрыкі, выглядае перспектыўным сродкам для адшукання боепрыпасаў на мінных палях. Аднак пакуль самі распрацоўшчыкі генетычна-мадыфікаванага сорту не ўпэўненыя, ці будзе расліна насамрэч эфектыўнай у рэальных умовах, бо яшчэ невядома, колькі трэба дыяксіду азоту, каб арабідопсіс пачырванеў.