Чаму Сноўдэн прасіў наведнікаў скласці мабільнікі ў лядоўню
Сустракаючыся з адвакатамі нядзельным вечарам у сваім гатэльным нумары ў Ганконгу, былы тэхнічны супрацоўнік АНБ Эдвард Сноўдэн папрасіў наведнікаў скласці мабільнікі ў лядоўню.
Чаму ён гэта зрабіў? Адказ зусім не ва ўздзеянні тэмпературы, як нехта можа падумаць. Насамрэч нават няважна, працуе лядоўня ці не. Рэч у метале, з якога зроблены корпус.
«Што вам трэба, дык гэта блакаваць радыёсігнал і цалкам блакаваць гук, — тлумачыць Адам Харві, дызайнер і распрацоўшчык адзення і аксесуараў для абароны ад праслухоўвання. У тым ліку ён нядаўна выпусціў экранавальны чахол для смартфонаў OFF Pocket.
Корпус лядоўні зроблены з металу з тоўстым пластом ізалятара, так што ён патэнцыйна можа выконваць і тую, і другую функцыю, і ўсё роўна, якая ўнутры тэмпература.
Тоўстыя металічныя сценкі ствараюць электрамагнітны бар’ер для радыёхваляў, на ўзор клеткі Фарадэя.
Клетка Фарадэя — прылада, вынайдзеная ангельскім фізікам і хімікам Майклам Фарадэем у 1836 годзе для экранавання апаратуры ад вонкавых электрамагнітных палёў. Некаторыя лядоўні падыходзяць для такой жа задачы.
Адам Харві эксперыментаваў з рознымі прыборамі ў доме і знайшоў яшчэ адзін, які таксама эфектыўна экрануе радыёхвалі. Ім аказаўся шэйкер марціні з нержавеючай сталі.
Акрамя электрамагнітных хваляў лядоўня добра заглушае гук, хоць вытворцы не даюць такіх гарантый.
Больш надзейным рашэннем супраць праслухоўвання было б проста дастаць акумулятар з прылады. На жаль, апошнім часам усё больш папулярнымі робяцца прылады, з якіх проста так дастаць акумулятар немагчыма. У той жа час дамагчыся поўнага выключэння без вымання акумулятара ў іх таксама немагчыма, так што праслухоўванне ў «выключаным» стане застаецца рэальнай пагрозай.
