Кіраўніку УЕФА дазволілі балатавацца на чацвёрты тэрмін. Але яму не надта хочацца
На Кангрэсе УЕФА ў Парыжы дэлегаты прагаласавалі за тое, каб дазволіць прэзідэнту асацыяцыі, славенцу Аляксандру Чэферыну балатавацца на пасаду кіраўніка УЕФА ў 2027 годзе яшчэ на адзін тэрмін. Супраць выступіла толькі Англія, устрымаліся Нарвегія, Ісландыя і Украіна, а ўсе астатнія былі «за».
Аляксандр Чэферын. Фота: AP Photo/Christophe Ena
Упершыню Аляксандр Чэферын быў абраны прэзідэнтам УЕФА ў 2016-м годзе, у 2019-м яго пераабралі на яшчэ адзін тэрмін. Тады ягоная кандыдатура падтрымлівалася аднагалосна ўсімі 55 членамі. А ў 2023-м годзе на чарговым кангрэсе УЕФА Чафярына пераабралі кіраўніком арганізацыі на трэці тэрмін.
Цяпер ён можа балатавацца яшчэ раз у 2027 годзе, але сам на прэс-канферэнцыі пасля пасля Кангрэса заявіў, што нібыта не будзе гэтага рабіць.
«Шчыра кажучы, я стаміўся ад COVID, нонсэнс-праекта з Суперлігай, самаабвешчаных маральных аўтарытэтаў, якія лічацца такімі, пакуль справа не тычыцца іх асабістых інтарэсаў», — сказаў Чэферын.
Паводле слоў кіраўніка еўрапейскага футбола, ён прыняў рашэнне не ісці на выбары ў 2027 годзе, прыкладна паўгода таму. Маўляў, кожнай арганізацыі патрэбна свежая кроў, а сам ён сумуе па сваёй сям'і.
А з апублічваннем свайго рашэння ён нібыта не спяшаўся таму, што хацеў паглядзець на «сапраўднае аблічча» некаторых людзей і не збіраўся ўплываць на галасаванне кангрэса.
Чытайце таксама:
Прэзідэнт УЕФА: Беларуская федэрацыя футбола не звязаная з рэжымам Лукашэнкі
У футбольнай Суперлізе Еўропы будзе тры дывізіёны, першы сезон пачнецца ў 2025 годзе
