Апублікаваны тэкст Віленскага мемарандуму апазіцыі

На старонцы Рады БНР у Фэйсбуку апублікаваны поўны тэкст Выніковага Мемарандуму, прынятага прадстаўнікамі беларускай апазіцыі ў Вільні 3 лістапада.

Дакумент называецца «Выніковы Мемарандум нарады старшыняў і кіраўнікоў беларускіх палітычных і грамадскіх арганізацыяў са Старшынёй Рады Беларускай Народнай Рэспублікі Аб захадах для забеспячэння незалежнасці Беларусі».

Асноўныя палажэнні Мемарандуму:

— Трэба дамагацца якнайшырэйшага прызнання міжнароднай супольнасцю, што Аляксандр Лукашэнка і дзяржаўныя органы пад ягоным кантролем, пры адсутнасці дэмакратычнай легітымнасці, не ёсць правамоцным і дзеяздольным прадстаўніцтвам Беларусі,

асабліва ў разе прыняцця ад імя Беларусі абавязкаў і пагадненняў з наступствамі, якія абмяжоўваюць ці абцяжарваюць яе суверэнітэт або датычаць распродажу дзяржаўнай маёмасці. Гэткія пагадненні ня будуць абавязковыя для дэмакратычнай беларускай дзяржавы ў будучыні, а стануць прадметам перагляду і магчымага скасавання або карэкцыі.

— Неабходна дамагацца гарантыяў непарушнасці беларускага нацыянальнага суверэнітэту з боку краінаў Еўрапейскага звязу, Злучаных Штатаў Амерыкі і Расейскай Федэрацыі,

непрызнання міжнародна-праўнай сілы любых небяспечных для суверэннага статусу Беларусі рашэнняў, якія ад яе імя можа зрабіць аўтарытарнае кіраўніцтва, а таксама непрызнання легітымнасці любых шкодных для суверэнітэту Беларусі правоў і прывілеяў, якія Расейская Федэрацыя можа сцвярджаць ці дамагацца ў Беларусі на грунце дактрыны «зоны асаблівых інтарэсаў».

— Дзеля забеспячэння суверэнітэту ад рызыкаў крызіснага і пераходнага перыяду ў абставінах калапсу аўтарытарнага рэжыму неабходна распрацаваць і палітычна ўзгадніць супольны пакет першачарговых палітычных, эканамічных і юрыдычных захадаў

у галіне энергэтычнай і харчовай бяспекі, культурна-інфармацыйнай палітыкі, забеспячэння адміністрацыйнай кіраванасці ва ўмовах пераходу да дэмакратыі, барацьбы з карупцыяй і арганізаванай злачыннасцю, а таксама забяспечыць максімальную падтрымку, якую можна мабілізаваць з боку прыхільных гэтым мэтам дзяржаваў і міжнародных арганізацыяў.

У Мемарандуме таксама гаворыцца, што грамадскія і палітычныя арганізацыі павінныя каардынавацца ў справе супрацьстаяння афіцыйнай прапагандзе, «якая знішчае беларускую нацыянальную свядомасьць».

«Павінен быць мацнейшы скаардынаваны ціск палітычнай і грамадзянскай супольнасці ў краіне і за яе межамі дзеля змяншэння ў беларускім грамадстве пачуцця страху, найперш вызвалення і рэабілітацыі палітычных вязняў, спынення палітычных рэпрэсіяў і дэмантажу рэпрэсіўнага апарату, свабоды для сродкаў масавай інфармацыі, а ўрэшце — правядзення свабодных выбараў», — адзначаецца ў дакуменце.

«Прадстаўнікі беларускай палітычнай і грамадзянскай супольнасці прызнаюць Раду БНР рэзервовым палітычным дэпазітарам беларускай незалежнай дзяржаўнай традыцыі»,

— гаворыцца ў Мемарандуме.

Мемарандум падпісалі:

Уладзімер Барадач, Аргкамітэт «Рады нацыянальнага адраджэння»

Вінцук Вячорка, Аргкамітэт «Беларускага Руху»

Аляксандр Дабравольскі, Аб’яднаная грамадзянская партыя

Мікалай Дземідзенка, «Малады Фронт»

Вольга Карач, ГК «Наш Дом»

Колас Уладзімер, Рада беларускай інтэлігенцыі

Аляксандар Мілінкевіч, «Рух «За Свабоду»

Станіслаў Шушкевіч, Беларуская сацыял-дэмакратычная Грамада

Янукевіч Аляксей, Партыя БНФ

Някляеў Уладзімер, кампанія «Гавары праўду»