Va Uźbiekistanie aryštavali Hulnaru Karymavu: vinavaciać u admyvańni $2 miljardaŭ
Va Uźbiekistanie aryštavanaja Hulnara Karymava, dačka byłoha prezidenta krainy Isłama Karymava. Joj vystaŭlenaje abvinavačańnie pa šaści artykułach Kryminalnaha kodeksa - ab machlarstvie, utojvańni zamiežnaj valuty, parušeńni mytnaha zakanadaŭstva, parušeńni praviłaŭ handlu abo akazańnia pasłuh, padrobcy dakumientaŭ i lehalizacyi dachodaŭ, atrymanych złačynnym šlacham, paviedamlaje Hienieralnaja prakuratura Uźbiekistana.
Va ŭpraŭleńni pa baraćbie z arhanizavanaj złačynnaściu i karupcyjaj Hienieralnaj prakuratury Uźbiekistana adznačyli, što ŭ 2015 hodzie Karymava była asudžanaja na piać hadoŭ abmiežavańnia voli. Zaraz praciahvajecca rasśledavańnie druhoj kryminalnaj spravy, i ŭ dačynieńni da jaje abrana miera strymańnia ŭ vyhladzie ŭziaćcia pad vartu.
Adznačajecca, što abvinavačańnie dačce eks-prezidenta «vystaŭlena na padstavie sabranych pa spravie dokazaŭ, u tym liku pakazańniaŭ členaŭ arhanizavanaj złačynnaj hrupy, śviedak, paciarpiełych, materyjałaŭ pravierak dziejnaści padkantrolnych arhanizavanaj hrupie 14 firmaŭ i 16 afšornych kampanij, kanfiskavanych piśmovych i rečavych dokazaŭ, zaklučeńniaŭ ekśpiertyz».
Ahulnaja suma naniesienaj intaresam dziaržavy i hramadzian škody pa dźviuch nazvanych kryminalnych spravach składaje za 1 trłn 270 młrd 200 młn sumaŭ, 1 młrd 651,8 młn. dałaraŭ ZŠA, 26,1 młn jeŭra.
Uźbiekskija ŭłady taksama raspaviali, što aktyvy arhanizavanaj złačynnaj hrupy, kudy, pavodle ich śćviardžeńnia, uvachodziła Karymava, znojdzienyja na terytoryi 12 zamiežnych krain - hrošy i viły ŭ Šviejcaryi, rachunki ŭ Šviecyi, damy i rachunki ŭ Vialikabrytanii, u Francyi - kvatery i zamak «Šato de Hruse», a taksama viły i hetak dalej.
45-hadovaja dačka prezidenta Hulnara Karymava ŭ 2010—2011 hadach zajmała pasadu nadzvyčajnaha i paŭnamocnaha pasła Uźbiekistana ŭ Ispanii, adnak paźniej apynułasia ŭ centry karupcyjnaha skandału, źviazanaha z admyvańniem hrošaj.
Paśla śmierci baćki, prezidenta Uźbiekistana Isłama Karymava, chadzili čutki pra śmierć Hulnary Karymavaj, ale paźniej źjaviłasia infarmacyja, što jana žyvaja i ŭtrymlivajecca pad strohim nahladam u Taškiencie.
