Kupalniki dla tvaru, razmazanyja vusny — samyja sprečnyja novyja beauty-trendy
Jakija tolki dzivy časam nam nie prapanoŭvać pasprabavać prafiesijanały sa śfier, źviazanych z pryhažościu i adzieńniem! Pra brovy-pierje, štučnyja viasnuški i makijaž u vyhladzie internet-miemaŭ «NN» užo pisała. A što jašče, niahledziačy na ŭsiu sprečnaść, znajšło prychilnikaŭ siarod modnikaŭ i achvočych da lubych navinak?
«Lollipop lips»
Ujavicie, što vy tolki što pafarbavali vusny i adrazu ž pačali smaktać ledzianiec. Jak skončycie, niešta padobnaje da «lollipop lips» u lusterku jakraz i ŭbačycie. Ale tolki na pieršy pohlad moža padacca, što taki niadbajny, krychu pankaŭski makijaž, prydumany vizažystam Veł Harłand, lohka dajecca. Na samoj spravie, jak i ŭ inšych rečach, kab dasiahnuć prastaty, daviadziecca prykłaści šmat namahańniaŭ, skarystaŭšy ŭsie svaje zdolnaści i mastacki hust.
Farbavańnie vałasoŭ z dapamohaj škła
Kałaryst Čyała Marvisi aktyŭna ŭkaraniaje ŭ sałonach pryhažości mietodyku hand-pressed coloring: spačatku farba chaatyčnymi šyrokimi mazkami nanosicca na škło, a potym jak by addrukoŭvajecca na kučary. U vyniku hałava davoli chutka zastrakoča jarkimi hałahrafičnymi pieralivami.
Bolš blasku!
Bliskaŭki modna nakładvać nie tolki na pavieki ci paznohci. Siońniašniaja moda zaklikaje vyjści za ramki zvyčajnaha i absypacca imi z noh da hałavy. U pryvatnaści, cyrulniki rajać vykarystoŭvać ich, kab zamaskiravać karani, što adraśli na pafarbavanych raniej vałasach. A z nadychodam leta mastaki prapanoŭvajuć stvarać hłamurnyja łuki na jahadzicach: hanarovaje zvańnie zorki plaža vam zabiaśpiečana.
Kałhotki napakaz
Usie my ŭžo nahladzielisia na trusy chłopcaŭ, jakija addajuć pieravahu volnamu, repierskamu stylu, dy na dziaŭčynskija, haspadyni jakich zakachalisia ŭ džynsy ź nizkaj pasadkaj. Pryjšoŭ čas vyhladajučych z-pad štanoŭ kałhotak u bujnuju sietku. Pryčym, čym šyrejšaj budzie humka ad kałhotak i čym bolš dzirak na džynsach, tym vy budziecie ličycca bolš modnym. Jak kažuć, nie treba saromiecca!
Nohi ŭ dziračku
Nastupny trend — prosta pałačka-ratavałačka dla kabiet, jakija chacia b adzin raz sutykalisia z tym, što kałhotki pačynali «jechać» u samy niazručny momant: idzieš ty ŭsia takaja pryhožaja, a tut niejkaja dzirka sapsuje ŭvieś nastroj. Supakojciesia dy praciahvajcie atrymlivać ad siabie asałodu! Akazvajecca, kałhotki, jakija nibyta rasstralali ci, jak minimum, addali na razarvańnie sabakam — heta modna i aktualna.
Džynsy z małankaj na jahadzicach
Praciahvajučy temu adzieńnia, spynimsia na novaj madeli džynsaŭ ad znakamitaj marki Levi's. Jana skanstrujavanaja takim čynam, kab rasšpilvać zamok mienavita zzadu. Niechta ŭžo pažartavaŭ, što takim čynam dyzajniery vyrašyli ablehčyć praces naviedvańnia prybiralni.
Trusy z «łapkaj viarbluda»
Vy, mahčyma, budziecie ździŭleny, ale pobač z vami mohuć žyć žančyny, jakija kampleksujuć z-za taho, što ich pramiežnaść u ciesnavatym adzieńni vyhladaje niepryhoža i navat vulharna. Znajšlisia tyja, chto vyrašyŭ zrabić na kompleksach trend: bializna z padkładkaj, jakaja imituje «kapyt viarbluda», karystajecca popytam u žančyn, jakija maryli pra «dyzajnierskuju vahinu» ci prosta chacieli źmianić jaje formu.
Kupalniki dla tvaru
Niechta chavaje pad kupalnikam nieidealny pres, a inšyja — svoj tvar. Kupalniki dla tvaru, ci fejskini, prydumali kitajskija dyzajniery z metaj źbierahčy skuru suajčyńnikaŭ ad niebiaśpiečnaha ŭździejańnia soniečnych promniaŭ. Chutka trend raźlacieŭsia pa ŭsim śviecie, i jakija tolki maski zaraz nie vyrablajuć.
