«Zabicie, prosta zabicie mianie, mnie treba dadomu»: pasažyra siłaj źniali z rejsa
U sacyjalnych sietkach pa ŭsim śviecie aktyŭna raspaŭsiudžvajecca videazapis, na jakim bačna, jak słužba biaśpieki amierykanskaj avijakampanii United Airlines hruba zdymaje z rejsa pasažyra i siłaj vyciahvaje jaho z samalota.
Na kadrach bačna, jak mužčynu siarednich hadoŭ siłaj zryvajuć ź siadzieńnia, a zatym za ruki i za nohi vałakuć pa prachodzie da vychadu.
Rejs pavinien byŭ vylecieć z Čykaha ŭ Łuiśvił u štacie Kientuki ŭ niadzielu ŭviečary.
United Airlines užo vybačyłasia za incydent u svaim tvitary, u kampanii zajavili, što pravodziać rasśledavańnie.
50-siekundny videazapis, zrobleny adnym z pasažyraŭ, byŭ retvitnuty bolš za 100 tysiač razoŭ.
Sieminaryst Džejz Anspa, jakija raźmiaściŭ videazapis u tvitary, napisaŭ: «United pradała bolš biletaŭ, čym było miescaŭ, i chacieła znajści čatyroch dobraachvotnikaŭ, jakija b addali svaje miescy supracoŭnikam kampanii, jakija pavinny byli vyjści na pracu na nastupny dzień».
«Vałancioraŭ nie akazałasia, i United vyrašyła vybrać ich samastojna. Vybrali doktara azijackaha pachodžańnia i jaho žonku. Doktar taksama pavinien byŭ vyjści na pracu na nastupny dzień, i jon admoviŭsia pakidać miesca», — dadaŭ Anspa.
«Praz 10 chvilin doktar zabieh nazad u samalot z akryvaŭlenym tvaram, schapiŭsia za pieraharodku i staŭ paŭtarać: «Mnie treba dadomu», — praciahvaje śviedka.
Jak mienavita pasažyr atrymaŭ ranieńni, nieviadoma — mahčyma, jaho źbili.
Na druhim videazapisie bačna, jak skryvaŭleny mužčyna trymajecca za pieraharodku ŭ sałonie i paŭtaraje: «Zabicie, prosta zabicie mianie, mnie treba dadomu».
Departamient avijatranspartu štata Čykaha zajaviŭ, što adzin z achoŭnikaŭ, jaki ŭziaŭ udzieł u incydencie, «adpraŭleny ŭ adpačynak», dadaŭšy, što departamient «nie ŭchvalaje jaho pavodzinaŭ».
U zajavie taksama havorycca, što pravodzicca rasśledavańnie i što padobnyja pavodziny «nie adpaviadajuć standartnym praceduram».
United zajaviła Bi-bi-si, što «na rejs 3411 z Čykaha ŭ Łuiśvił było pradadziena zanadta šmat kvitkoŭ».
«Paśla taho jak našy supracoŭniki pasprabavali znajści vałancioraŭ, adzin z klijentaŭ admoviŭsia pakinuć bort dobraachvotna, paśla čaho byli vyklikany supracoŭniki słužby biaśpieki», — dadali ŭ kampanii.
Nieŭzabavie paśla hetaha kiraŭnik United Oskar Muńas napisaŭ u «Tvitary»: «Heta vielmi sumny dla ŭsich nas incydent. Ja vybačajusia za toje, što daviałosia pieranieści hetym klijentam».
«Naša kamanda ŭ ekstranym paradku supracoŭničaje z uładami, a taksama pravodzić ułasnaje rasśledavańnie. My sprabujem źviazacca z hetym pasažyram, kab razhledzieć i vyrašyć hetuju situacyju», — piša Muńas.
