Dziakuj Jeŭrazijskamu sajuzu? U Pastavach 300 rabotnikaŭ paśpiachovaha pradpryjemstva mohuć stracić pracu
U Redakcyju «Našaj Nivy» źviarnulisia supracoŭnicy zavoda «Bielit», što znachodzicca ŭ Pastavach. Jany paskardzilisia, što praz 1,5 miesiaca zavod moža zakrycca, a rabočyja straciać pracu.
Zavod «Bielit». Fota — belit.by
«Bielit» — paśpiachovaje pradpryjemstva, zajmajecca vytvorčaściu ryźzia. Z-za miažy ŭvoziać adzieńnie, jakoje było va ŭžyvańni. Bolšaść idzie na ryźzio, častku pradajuć jak sekand-chend.
«Mnohija hady naša ryźzio zajmaje lidzirujučyja miescy na rynkach jeŭrapiejskich krain, krain SND i Rasii», — paviedamlajecca na sajcie zavoda. Hrašovych prablemaŭ u pradpryjemstva taksama, zdajecca, niama. Dyk što zdaryłasia?
U adnym z cechaŭ zavoda. Fota — belit.by
«Nas usich sabrali tydzień tamu, i dyrektar zavoda paviedamiŭ, što paśla Novaha hoda my zakryjemsia. My — heta vytvorčaść ryźzia. Zastajemsia biez pracy, skazaŭ dyrektar, tamu što zavod hublaje lhoty na vypłatu mytnych pošlinaŭ, bo mianiajecca mytnaje zakanadaŭstva. Vytvorčaść stanie nierentabielnaj. My budziem siadzieć za svoj košt, nie budzie pracy. I pacichu zavod stanie bankrutam», — raspaviała rabočaja zavoda Ina Capielik.
Pa słovach žančyny, pra kampiensacyi pry zvalnieńni pakul nichto ničoha nie havaryŭ. Prosta papiaredzili, što voś tak moža zdarycca — zavod spynicca.
Sama Ina Capielik pracuje rezčycaj.
«U nas 260 čałaviek na zavodzie, kala 70% žančyny. Chapaje i šmatdzietnych siemjaŭ. Ja pracuju 2 praz 2 dni pa 12 hadzin. Zarablaju 4,5 miljona — heta, ja liču, vielmi dobry zarobak. U lubym razie, bolšaść žančyn u Pastavach zarablaje 2—2,5 miljona, nu, moža, try… Dyj Pastavy — maleńki haradok, pałova našaha kalektyvu pracu znajści prosta nie zmoža, — paskardziłasia žančyna.
Rabotniki napisali kalektyŭnyja zvaroty ŭ Administracyju prezidenta, urad, Dziaržkantrol, Viciebski abłvykankam, Saviet respubliki i ciapier čakajuć adkazu.
Situacyju prakamientavaŭ dyrektar «Bielita» Dźmitry Čyžeŭski. Jon pryznaŭ, što «jość istotnaja prablema nakont dalejšaj pracy».
«Ale ŭsio nie zusim tak. Ja sabraŭ ludziej i skazaŭ, što pytańnie pakul nie vyrašanaje. Im zajmajucca na ŭsich uzroŭniach. Ale pytańnie vielmi składanaje, kab jaho chutka vyrašyć. I niekalki pracentaŭ imaviernaści isnuje, što my zakryjemsia paśla Novaha hoda. A jak jano budzie, ja nie hatovy skazać», — adkazaŭ Čyžeŭski.
Dźmitryj Čyžeŭski. Fota — belit.by
Jon rastłumačyŭ sutnaść prablemy tak:
«Mianiajucca ŭmovy pracy ŭ svabodnych ekanamičnych zonach, i my traplajem pad novyja ŭmovy. My traplajem pad vielmi vialikuju pošlinu. A syravinu, patrebnuju nam, niama dzie ŭziać ani ŭ Biełarusi, ani ŭ Rasii. I kali pošlina zachavajecca, to my nie zmožam pracavać, košt našaj pradukcyi budzie ŭdvaja bolšy, čym u kankurentaŭ».
Praŭda, Čyžeŭski zapeŭniŭ, što panikavać pakul rana.
«Pytańnie vielmi składanaje, tut zaviazany naš udzieł u adzinaj ekanamičnaj prastory z Rasijaj, patrabavańni Jeŭrazijskaha sajuza… Nu i davodzicca być niejkim čynam adnačasova «i pryhožym, i razumnym», — patłumačyŭ Čyžeŭski. — Ale ja pakul nastrojeny na dalejšuju pracu, maju pradčuvańnie, što ŭsio vyrašycca, moža, u apošnija dni, moža, 31 śniežnia, ale vyrašycca. Ja razumieju kalektyŭ, razumieju ich zakłapočanaść, bo va ŭsich siemji, dzieci… Ale paŭtaraju: usio jašče nie nastolki drenna, kab pačynać bić u zvany. Jašče jość paŭtara miesiaca, a heta davoli vialiki termin. I ja viedaju, što pytańniem zajmajucca, pryčym na davoli vysokich uzroŭniach».
Na «Bielicie» vyrablajuć taksama tratuarnuju plitku, ale hałoŭny i asnoŭny kirunak vytvorčaści siońnia — ryźzio. Siarod alternatyŭnych idej — zapuścić vytvorčaść bytavoj techniki…» — padsumavaŭ Dźmitryj Čyžeŭski.
