Milicyjant vyratavaŭ minčanku, jakaja ŭciakła z balnicy
U Minskim rajonie milicyjant vyratavaŭ žančynu, jakaja ŭciakła sa staličnaj balnicy, paviedamili ŭ Ministerstvie ŭnutranych spraŭ.
Uładzisłaŭ Bazoŭski. Fota MUS
Pozna ŭviečary 3 maja kamandzir uzvoda bataljona milicyi Centralnaha adździeła Departamienta achovy Minska starejšy lejtenant Uładzisłaŭ Bazoŭski viartaŭsia paśla pravierki vartavoha pasta «Zasłaŭskaje vadaschovišča» u vioscy Kačyna Minskaha rajona. Da jaho padbieh minak i raskazaŭ, što bačyŭ, jak z parapieta ŭ vadu skočyŭ čałaviek. Išoŭ mocny doždž, razhledzieć niešta zdalok było nielha, tamu jany pieraadoleli bolš za 600 m, pakul dabralisia da zručnaha miesca, dzie milicyjant kinuŭsia ŭ vadu i papłyŭ na dapamohu.
Tanuła žančyna. Jana nahłytałasia vady. Starejšy lejtenant vyciahnuŭ paciarpiełuju na bierah i akazaŭ joj pieršuju miedycynskuju dapamohu. Žančyna chutka pryjšła ŭ siabie, ale dryžała i kašlała. Vyśvietliłasia, što jana sprabavała skončyć žyćcio samahubstvam. Padajučy z parapieta, mocna ŭdaryłasia ab bietonnuju admostku.
Datelefanavacca da miedykaŭ pravaachoŭniku ŭdałosia nie adrazu. Jaho telefon pramok i sapsavaŭsia, bo jon nie paśpieŭ dastać jaho z adziežy pierad skačkom. Chutkuju ŭdałosia vyklikać ŭžo na vartavym poście. Miedyki pavieźli paciarpiełuju ŭ balnicu. Ciapier jana pa-za niebiaśpiekaj, choć i atrymała pieraachaładžeńnie. Stan žančyny stabilny, i jana ŭžo idzie na papraŭku.
Pry vyśviatleńni abstavinaŭ stała viadoma, što milicyjant vyratavaŭ 48-hadovuju minčanku, jakuju z 1 maja šukali rodnyja i blizkija. Žančyna syšła z balnicy paśla składanaj apieracyi i źnikła.
