Na žychara Minska napaŭ raspaŭsiudnik ściažkoŭ SSSR
Hetaje fota raspaŭsiudnika ściažkoŭ SSSR zroblena niepasredna pierad napadam.
Žychar Minska Andrej Kim raskazaŭ, što siońnia na jaho napaŭ małady čałaviek, jaki raspaŭsiudžvaŭ minijaciurnyja ściahi SSSR.
Andrej Kim znachodziŭsia na parkoŭcy la handlovaha centra «Ekspabieł», kali zaŭvažyŭ maładoha chłopca, jaki prapanoŭvaŭ kiroŭcam ściažki SSSR.
«Ściažki byli z prysoskami, kab macavać ich na škło aŭtamabila. Ja padyšoŭ da chłopca i skazaŭ jamu, što nie varta pradavać hetyja ściažki, zapatrabavaŭ kab toj syšoŭ. Na heta chłopiec pakruciŭ hałavoju — daŭ mnie zrazumieć, što jon hłuchi i nie čuje mianie. Tady ja pačaŭ pakazvać jamu na mihi, što vyklikaju milicyju. Chłopiec adyšoŭ ad mianie i prapanavaŭ ściažki jašče adnamu kiroŭcu. Toj vielmi emacyjna patłumačyŭ, što jamu ściažki nie patrebnyja, bo ad SSSR było adno hora», — kaža Kim.
Kim vyrašyŭ sfatahrafavać raspaŭsiudnika ściažkoŭ na mabilny telefon. Pabačyŭšy heta, małady čałaviek prajaviŭ ahresiju.
«Spačatku jon zachacieŭ uciačy, ale potym pieradumaŭ i nakinuŭsia na mianie. Jon sprabavaŭ udaryć mianie ŭ tvar, ale pramachnuŭsia. Potym jon pasprabavaŭ vychapić moj mabilny telefon», — paviedamiŭ Kim.
Andrej Kim raskazaŭ, što paśla niaŭdałaj ataki chłopiec syšoŭ z parkoŭki. Kim vyklikaŭ milicyju i napisaŭ zajavu. «Milicyjanty skazali mnie, što buduć šukać jaho, skapijavali sabie zroblenyja fatazdymki hetaha chłopca», — kaža Kim.
Padobnyja raspaŭsiudniki ściažkoŭ masava źjavilisia ŭ Biełarusi z 2013 hoda. Zvyčajna heta hłuchija maładyja ludzi, jakija pradajuć kiroŭcam dziaržaŭnyja ściahi Rasii (časta razam ź biełaruskim ściaham) ci ściažki SSSR. U raspaŭsiudnikaŭ niama pastajannych punktaŭ — jany źjaŭlajucca na skryžavańniach ci parkoŭkach, pracujuć karotki čas i chutka sychodziać. Chto najmaje hłuchich raspaŭsiudžvać ściažki, pakul nieviadoma.
