Minharvykankam paličyŭ nieetyčnym raźmiaščeńnie partreta Bykava na transfarmatarnaj padstancyi
Kaardynatar prajekta SIGNAL Aleh Łaryčaŭ atrymaŭ adkaz ad Minharvykankama na svoj list z prośbaj dazvolić nanieści partret Vasila Bykava na ścianu transfarmatarnaj budki ŭ rajonie płoščy Pieramohi. «Minski harvykankam ličyć nieetyčnym raźmiaščeńnie partretnaha malunka narodnaha piśmieńnika Biełarusi Vasila Bykava na transfarmatarnaj padstancyi», — havorycca ŭ liście ź Minharvykankama.
U toj ža čas u tym, kab nanieści partret piśmieńnika na ścianu padstancyi mastakam nie admovili, a adpravili na ŭzhadnieńnie da bałansaŭtrymalnika — u rajonnyja elektryčnyja sietki.
Nahadajem, da 90-hodździa z dnia naradžeńnia Vasila Bykava ŭ horadzie pavinien byŭ źjavicca jaho vialiki partret. Zrabić jaho ŭ ramkach prajekta SIGNAL zadumali vuličnyja mastaki z kamandy HoodGraff jak praciah vialikaj partretnaj sieryi, raspačataj u Viciebsku.
Pieršyja nakidy partreta Bykava na transfarmatarnaj budcy ŭ dvary kala Doma bytu na płoščy Pieramohi źjavilisia ŭviečary 16 červienia. A ŭžo 18 červienia ranicaj niezakončanuju pracu zafarbavali rabotniki RES-4. Udzielniki prajekta — dva mastaki, ich mieniedžar i kiraŭnik prajekta SIGNAL atrymali štraf — u sumie 18 miljonaŭ.
Da viečara 18 červienia na śviežapafarbavanaj transfarmatarnaj padstancyi nieviadomy pakinuŭ nadpis siniaj farbaj «Tut byŭ Vasil Bykaŭ».
Červień 19 padstancyju pafarbavali šeraj farbaj druhi raz.
Tady arhanizatary stryt-art akcyi pahutaryli z hałoŭnym inžynieram rajonnych elektrasietak, staršynioj kamiteta architektury i horadabudaŭnictva, hałoŭnym architektaram horada Mikałajem Ułasiukom i jaho namieśnikam, dyrektaram pa ideałohii ŽREA Partyzanskaha rajona, načalnikam upraŭleńnia ideałahičnaj raboty administracyi Partyzanskaha rajona i namieśnikam kiraŭnika administracyi rajona.
Ni adzin čynoŭnik u łancužku nie vykazaŭsia suprać partreta Bykava, kožny chacieŭ dapamahčy, ale adpraŭlaŭ za kančatkovym rašeńniem u vyšejšuju instancyju. Adkaz, jaki atrymali mastaki 9 lipienia ad vyšejšaj instancyi — Mienharvykankama, — situacyju nijak nie źmianiŭ.
Pa słovach Aleha Łaryčava, jany majuć namier pisać paŭtorny zapyt u Minharvykankam. «Mahčyma, my paprosim Minharvykankam abhruntavać «nieetyčnaść» transfarmatarnaj padstancyi abo ŭzhadnić «etyčny» dzieviacipaviarchovik», — raspavioŭ Aleh Łaryčaŭ.
