У Мінску адкрылі Цэнтр імя Аляксандра Мядзведзя — фота
16 верасня вядомы ў свеце беларускі барэц вольнага стылю, трохразовы алімпійскі чэмпіён Аляксандр Мядзведзь адзначыў 75-годдзе.
Да юбілею было прымеркавана адкрыццё ў мінулыя выхадныя ў Мінску Цэнтра алімпійскага рэзерву па барацьбе імя Аляксандра Мядзведзя [на месцы кінатэатра "Вільнюс"]. Паводле слоў старшыні Беларускай федэрацыі барацьбы Юрыя Чыжа, новае спартзбудаванне надасць імпульс далейшаму развіццю спартыўнай барацьбы ў Беларусі.
А сам праслаўлены атлет выказаў надзею, што ў новым спарткомплексе вырастуць будучыя чэмпіёны.
У цэнтры абсталявана некалькі барцоўскіх залаў, а таксама трэнажорная зала, душавыя, раздзявальні, ёсць тут таксама саўна і кафэ. У будынку размяшчаецца і Зала барцоўскай славы, у якой першыя наведвальнікі маглі ўбачыць узнагароды трох самых славутых беларускіх барцоў — алімпійскіх чэмпіёнаў розных гадоў Алега Караваева, Камандара Маджыдава і Аляксандра Мядзведзя.
