Радзільня ў Чалябінску заплаціць кампенсацыю жанчыне за падмену дачкі 30 гадоў таму
Цэнтральны раённы суд Чалябінска пастанавіў спагнаць 1 мільён расійскіх рублёў (каля 17 тыс. даляраў) з рэгіянальнага Міністэрства аховы здароўя і радзільні на карысць мясцовай жыхаркі Зоі Туганавай, якой у гэтай радзільні 30 гадоў таму падмянілі нованароджаную дачку (Таццяну Туганаву).
Жанчына падала пазоў у суд 11 красавіка 2017 года.
Суд часткова задаволіў пазоў пацярпелага боку, які прасіў спагнаць на яе карысць 10 мільёнаў расійскіх рублёў (169 тысяч даляраў). Зоя Туганава і яе прадстаўнік патрабавалі спагнаць гэтую суму з адказчыкаў — перынатальнага цэнтра Чалябінскай вобласці, Міністэрства аховы здароўя Расіі і Мінфіна Расіі, а таксама з абласных Міністэрства аховы здароўя і ўрада.
Пазоўшчыца мяркуе, што віна медработнікаў, з-за якой яна «перанесла шмат пакут», даказаная.
«Пасля таго як я даведалася пра падмену дзяцей, увесь свет спыніўся: бо пасля падмены мая родная дачка з сям'і Тулегенавай трапіла ў дзіцячы дом, і зараз нават табліцы множання не ведае», - адзначыла яна.
Зоя Туганава і яе прадстаўнік у судзе сцвярджаюць, што падмена дзяўчынкі адбылася ў Чалябінску ў абласной акушэрскай гінекалагічнай бальніцы ў 1987 годзе.
Пасля таго як Туганава нарадзіла дачку, медыкі пераблыталі яе з іншай дзяўчынкай. Па словах маці, яна здагадалася пра падмену дзіцяці адразу пасля родаў і паспрабавала тады вырашыць гэтую праблему, але дактары сказалі, што дзіця яе. Туганава адзначыла, што «пад уплывам тэлеперадачы пра падмену дзяцей» выхаваная ёю дачка Кацярына Туганава правяла даследаванне з ДНК-аналізам. Падчас даследавання знайшлі родную дачку пазоўшчыцы, а сваяцтва пацвердзіў ДНК-аналіз.
Па дадзеных інфармагенцтва «Мага-Урал», Зоя Туганава лічыць, што падмена ў радзільні адбылася з-за блытаніны з «сугучнымі прозвішчамі». Разам з ёй у радзільным доме знаходзілася жанчына па прозвішчы Тулегенава.
