Пасольства ЗША ў Расіі больш не будзе прымаць заявы на візы ад беларусаў
Пасольства ЗША ў Маскве і консульства ў Санкт-Пецярбургу адмяняюць прыём заяў на атрыманне віз ад грамадзян Рэспублікі Беларусь. Пра гэта паведамляе прэс-служба пасольства.
«Сумоўі для грамадзян Рэспублікі Беларусь, якія падалі заяву на неіміграцыйную візу ЗША і ўжо аплацілі консульскі збор, будуць пераназначаныя», — сказана ў паведамленні.
Грамадзянам нашай краіны рэкамендуюць звярнуцца для праходжання сумоўяў для атрымання неіміграцыйных візаў у пасольствы ЗША ў Варшаве, Кіеве ці Вільні.
***
Раней пасольства ЗША ў Расіі абвясціла, што з 23 жніўня 2017 года прыпыняецца выдача неіміграцыйных візаў у расійскіх рэгіёнах. Гэта звязана з абмежаваннем колькасці супрацоўнікаў дыпмісіі, якога запатрабавала Масква ў адказ на амерыканскія санкцыі.
З 1 верасня сумоўя для выдачы візаў будуць праводзіцца толькі ў пасольстве ў Маскве. З 21 жніўня пачнецца адмена сумоўяў, назначаных у консульствах у Санкт-Пецярбургу, Екацярынбургу і Уладзівастоку.
Абмежаванні захаваюцца да таго часу, пакуль дзейнічае рэжым скарачэння штата дыпмісіі. Консульскія зборы за візы будуць дзейнічаць на працягу года.
