Віцэ-прэм'ер Жарко: Лічбы прыёму ў ВНУ будуць вызначаць Мінпрацы і Мінэканомікі
Урад не збіраецца штучна скарачаць колькасць тых, хто паступае ў ВНУ, але кантрольныя лічбы прыёму будуць вызначаць Мiнiстэрства працы і сацыяльнай абароны і Міністэрства эканомікі. Пра гэта заявіў у эфіры тэлеканала «Беларусь 1» віцэ-прэм'ер Васіль Жарко, піша Tut.by.
Паводле яго слоў, ужо цяпер назіраецца памяншэнне набору ў ВНУ. У 2017 годзе ў ВНУ паступалі на 7% чалавек менш, чым у мінулым, але вырасла колькасць тых, хто паступае ў прафесійна-тэхнічныя вучэльні і ССНУ.
«Да сённяшняга дня набор у ВНУ планавалі рэктары. Рэктару выгадна — чым больш у яго студэнтаў, чым больш у яго платнікаў», — мяркуе Жарко.
Ён адзначыў, што кантрольныя лічбы прыёму ў ВНУ «павінна вызначаць эканоміка», а менавіта, Міністэрства працы і сацыяльнай абароны і Міністэрства эканомікі. Яны будуць вызначаць тыя лічбы, якія патрэбныя для той ці іншай галіны.
«Зноў жа, калі мы павысім прахадныя балы ў ВНУ, то паступяць тыя, хто павінен навучацца. Няма штучнай задачы скараціць вышэйшую адукацыю, але яна павінна быць для падрыхтаванага чалавека», - адзначыў віцэ-прэм'ер.