Правільней было б казаць «Сара», а не «Зара»
Але вымаўленне «Зара» прыжылося, і наўрад ці зменіцца.
Адкрыццё першай крамы ў Беларусі. Фота Сяргея Гудзіліна.
Сетку крамаў Zara заснаваў іспанскі магнат Амансіа Артэга. Калі вы трапіце ў Іспанію, зразумееце, што там «Зару» называюць не інакш як «Сара» па той простай прычыне, што ў іх літара Z гучыць прыкладна як наша «С».
Напрыклад, назва горада Zaragoza традыцыйна перадаецца як Сарагоса.
«У іспанскай мове гэтае Z вымаўляецца як міжзубны гук, якога ў нас не існуе. Таму нам лягчэй перадаць яго як [З], хаця фактычна ён мусіў бы перадавацца як [С], — кажа перакладчык Анатоль Прасаловіч. — Аднак тут яшчэ важны кантэкст. «Сара» ў нашых краях асацыюецца з яўрэйскім іменем. Мяркую, гэта таксама магло паўплываць на назву».
Нагадаем, што 10 жніўня ў Dana Mall, што каля Нацыянальнай бібліятэкі, запрацавалі шэсць крамаў канцэрна Inditex Group: Zara, Zara Home, Pull&Bear, Bershka, Stradivarius і Oysh. «Наша Ніва» трапіла на адкрыццё і зірнула на асартымент і цэны.
