Амерыканскі генерал: Расія недастаткова празрыстая з вучэннямі ў Беларусі
Як заявіў агенцтву Reuters 3 жніўня камандуючы амэрыканскімі сіламі на вучэньнях у Эўропе генэрал Джон Гілі, Масква «недастаткова празрыстая», бо не запрасіла заходніх назіральнікаў, тады як расейскія прадстаўнікі прысутнічалі на нядаўніх манэўрах ЗША і NATO ў Чарнаморскім рэгіёне.
У намечаных на 14-20 верасьня вучэньнях «Захад-2017» на тэрыторыі Беларусі маюць прыняць удзел да 13 тысяч вайскоўцаў і 680 адзінак баявой тэхнікі.
Раней кіраўнік Беларусі Аляксандар Лукашэнка заяўляў: «Я патрабую, каб гэтае мерапрыемства на тэрыторыі нашай краіны было празрыстым і ўсе мерапрыемствы былі даступныя ня толькі для нашых сяброў па АДКБ, ЭАЭС, СНД, але і для прадстаўнікоў Паўночнаатлянтычнага блёку. Мы нічога не хаваем і хаваць не павінныя. Калі натаўцы хочуць прысутнічаць на нашым вучэньні, калі ласка».
Генэрал Гілі расказаў, што ў адказ на ўзрастаньне пагрозы агрэсіўных дзеяньняў з боку Расеі — ЗША у 2018 годзе плянуюць правесьці з саюзьнікамі па NATO 11 буйных вучэньняў наземных сіл, авіяцыі і флёту.
