Мінская міліцыя прадае аўтазакі праз УКантакце ФОТА
У сувязі з абнаўленнем аўтапарку сталічная міліцыя прадае службовыя аўтамабілі.
Азнаёміцца з асартыментам можна ў суполцы УКантакце. У наяўнасці УАЗікі, Жыгулі, Лады, некалькі аўтобусаў і мікрааўтобусаў.
І аўтазак.
Аўтазак будзе каштаваць 16,5 тысячы беларускіх рублёў. УАЗ — 2 ці 3 тысячы, іржавы жыгулёнак — 1,3 тысячы.
«Для тых, хто захапляецца рыбалкай або паляваннем, гэты транспарт незаменны ў суадносінах «кошт-якасць». Па словах начальніка аўтагаспадаркі ГУУС Мінгарвыканкама Валерыя Траўкіна, некаторыя пакупнікі бяруць іх для паўсядзённых мэтаў, — паведамляюць міліцыянты пра службовыя аўто. — Вядома, гэтыя машыны не ў ідэальным стане, бо яны ўжо больш за дзясятак гадоў эксплуатаваліся, а прабег ўжо пераваліў за 100 тысяч кіламетраў. Але пры пэўным касметычным рамонце і замене некаторых дэталяў «жалезны конь» яшчэ нямала адслужыць свайму новаму гаспадару. Варта адзначыць, што такія аўто карыстаюцца папулярнасцю. Толькі за мінулы месяц было прададзена з дзесятак машын».
Перад продажам уся міліцэйская атрыбутыка з машын будзе прыбрана. Іх перафарбуюць і здымуць мігалкі, паведамілі ў прэс-службе мінскай міліцыі.