Беларускі экіпаж перамог у індывідуальнай гонцы на міжнародных спаборніцтвах па танкавым біятлоне
Першы беларускі экіпаж пад камандаваннем старшага прапаршчыка Сяргея Міхно спачатку быў прызнаны другім у індывідуальнай гонцы танкавага біятлону, якая праходзіць на падмаскоўным палігоне Алабіна (Расія). Такая інфармацыя размешчана на сайце Мінабароны Беларусі, піша БелТА.
У сваім заездзе наш танк паказаў другі вынік. Пазней суддзі перагледзелі вынік заезда і аддалі беларусам першае месца.
Другі і трэці экіпажы выйдуць на трасу 1 і 5 жніўня адпаведна.
Па словах механіка-кіроўцы старшага прапаршчыка Віталя Багрудзенкі, які выступіў у складзе першага экіпажа, цяперашняя траса танкавага біятлона мае шэраг змяненняў, і толькі пасля першага круга ён змог зразумець, як больш эфектыўна пераадольваць перашкоды. «Эскарпа і калейны мост сталі прыкметна вышэйшыя, — адзначыў Віталь. — Але ў цэлым праблем з перашкодамі не было: танк пераадольваў іх мякка, без рэзкіх скачкоў і ўдараў. Пасля заездаў мы зможам з іншымі экіпажамі абмеркаваць ўсе заўважаныя моманты на трасе».
Беларускія ўдзельнікі традыцыйна паказалі высокі клас па стральбе - пацэлілі ва ўсе пяць мішэняў: тры «танкі», «верталёт» і «РПГ».
Першы этап танкавага біятлона - індывідуальная гонка - самы працяглы. Ён праводзіцца ад 29 ліпеня да 6 жніўня. Па выніках індывідуальных заездаў будзе складзены рэйтынг найлепшых экіпажаў. У паўфінальную эстафету выйдуць 12 каманд з 18. І толькі 4 найлепшыя змогуць пазмагацца ў фінале за месцы на п'едэстале.
Танкавы біятлон з'яўляецца часткай армейскіх міжнародных гульняў - 2017, якія праходзяць ад 29 ліпеня да 12 жніўня на тэрыторыі пяці дзяржаў: Беларусі, Расіі, Казахстана, Кітая і Азербайджана. Праграма гульняў уключае 28 конкурсаў па палявой, паветранай і марской вывучцы.
