Вайскоўцаў прыцягнулі да збору ўраджаю
У адпаведнасці з даручэннем Савета Міністраў Узброеныя Сілы аказваюць дапамогу сельскагаспадарчым арганізацыям у правядзенні ўборкі, паведамляецца на сайце Міністэрства абароны.
Асабовы склад УС Беларусі з 25 ліпеня прыступіў да работ у 14 сельскагаспадарчых арганізацыях у Мінскім, Старадарожскім раёнах Мінскай вобласці, Мсціслаўскім, Асіповіцкім раёнах Магілёўскай вобласці.
Для кіраўніцтва дзеяннямі асабовага складу, выдзеленага для аказання дапамогі па ўборцы ўраджаю, арганізацыі ўзаемадзеяння з мясцовымі органамі ўлады ва Узброеных Сілах створаная аператыўная група.
Са складу вайскоўцаў і грамадзянскага персаналу злучэнняў і воінскіх часцей УС сфармаваныя зводныя аўтамабільныя ўзводы 30-й асобнай чыгуначнай брыгады дэпартамента транспартнага забеспячэння Мінабароны і 15-й зенітнай ракетнай брыгады Ваенна-паветраных сіл і войскаў супрацьпаветранай абароны.
Для перавозкі сельскагаспадарчых грузаў задзейнічана больш за 80 ваеннаслужачых і грамадзянскага персаналу і больш за 50 адзінак аўтамабільнай тэхнікі. На сённяшні дзень перавезена больш за 560 т сельскагаспадарчай прадукцыі.