Пераліваў бензін на кухні каля пліты: гарадзенец спаліў кватэру
У Гродне гарэла кватэра ў шматпавярховіку: мужчына пераліваў бензін побач з уключанай плітой. Пра гэта БелТА паведамілі ў Гродзенскім абласным упраўленні МНС.
Паведамленне пра пажар у кватэры на чацвёртым паверсе аднаго з дамоў па вуліцы Карбышава ў Гродне паступіла 24 ліпеня каля 20 гадзіны. Праз тры хвіліны ратавальнікі былі на месцы.
У кватэры было шчыльнае задымленне, гарэла маёмасць. «Гаспадар кватэры знаходзіўся ў адным з пакояў каля акна і самастойна выбрацца не мог. Ратавальнікі падняліся па аўталесвіцы і вывелі пацярпелага на вуліцу», — распавялі ў МНС.
Мужчына з апёкамі I—II ступені (17% цела) дастаўлены ў рэанімацыйнае аддзяленне бальніцы. Стан цяжкі.
Паводле папярэдняй інфармацыі, прычынай пажару стала неасцярожнае абыходжанне з агнём. Мужчына пераліваў бензін з каністры ў пластыкавыя бутэлькі побач з уключанай газавай плітой.
