Праект: рэцэпты на лінзы будуць выдавацца на год
Кантактныя лінзы неўзабаве можна будзе купляць толькі па рэцэпце доктара, які будзе дзейнічаць на працягу года, паведамілі ў РУП «Цэнтр экспертыз і выпрабаванняў у ахове здароўя».
Міністэрства аховы здароўя рыхтуецца вынесці на грамадскае абмеркаванне пытанне аб абмежаванні продажу кантактных лінзаў без рэцэпту лекара.
«Кантактныя лінзы (мяккія, жорсткія, каляровыя, з дыяптрыйнасцю і без) з'яўляюцца медыцынскімі вырабамі і патрабуюць абавязковай кансультацыі спецыяліста — доктара-афтальмолага, а таксама дакладнага выканання паказанняў да назначэння і правілаў падбору з улікам індывідуальных асаблівасцяў, характарыстык рэфракцыі і супрацьпаказанняў», — паведамілі Sputnik у Цэнтры экспертыз і выпрабаванняў у ахове здароўя.
Як падкрэсліў суразмоўца, нашэнне лінзаў без дыёптрый нясе дадатковую рызыку, бо пацыент не знаёмы з правіламі апрацоўкі, нашэння і захоўвання лінзаў.
«Для набыцця кантактных лінзаў неабходны агляд доктара-афтальмолага раз на год. Рэцэпт на кантактныя лінзы, таксама як і на акуляры карыгіруючыя, дзейнічае адзін год. Такім чынам, па гэтым рэцэпце пацыент можа набываць кантактныя лінзы на працягу года», — адзначылі ў РУП «Цэнтр экспертыз і выпрабаванняў у ахове здароўя».
Рэцэптурны продаж кантактных лінзаў, запэўніў суразмоўца агенцтва, не ўскладніць працэс куплі лінзаў для беларусаў.
